სახალხო დამცველმა თბილისის სახელმწიფო უნივერსიტეტს განსხვავებული მოსაზრების ნიშნით დისკრიმინაციის დადგენის შესახებ ორი რეკომენდაციით მიმართა.

სახალხო დამცველმა დაადგინა, რომ ლექტორის მიმართ უნივერსიტეტის მხრიდან ადგილი ჰქონდა პირდაპირ დისკრიმინაციას განსხვავებული მოსაზრების გამო.

ომბუდსმენის ცნობით, განმცხადებლები, მოწვეული ლექტორის სტატუსით, წლების განმავლობაში კითხულობდნენ ლექციებს უნივერსიტეტის ეკონომიკისა და ბიზნესის ფაკულტეტზე. ისინი ფაკულტეტზე არსებული მდგომარეობის შესახებ საჯაროდ გამოხატავდნენ კრიტიკულ მოსაზრებებს, რის გამოც ეკონომიკისა და ბიზნესის ფაკულტეტის დეკანმა მათ პროფესორად მოწვევაზე უარი განაცხადა.

სახალხო დამცველი აცხადებს, რომ ლექტორებმა მათთან ელექტრონული მიმოწერა წარმოადგინეს. ომბუდსმენის შეფასებით, განმცხადებლების უფლებაში ჩარევის საფუძველი იყო მათ მიერ დაფიქსირებული მოსაზრებები, რაც მიუღებელი აღმოჩნდა დამსაქმებლისთვის. სახალხო დამცველი აღნიშნავს იმასაც, რომ მოპასუხემ [თსუ] ვერ წარადგინა სათანადო და დამაჯერებელი არგუმენტაცია.

"განმცხადებლის განმარტებით, 2018 წლის 19 ნოემბერს, ეკონომიკისა და ბიზნესის ფაკულტეტის საბჭოს სხდომაზე, განმცხადებლისა და იმ პროფესორების შესახებ, რომლებიც განსხვავებულ მოსაზრებებს აფიქსირებენ, გამოითქვა მოსაზრება, რომ "ასეთი ადამიანები აღარ უნდა იყვნენ უნივერსიტეტში". განმცხადებელი განმარტავს, რომ მათ გამოითხოვეს საბჭოს სხდომის ჩანაწერი, თუმცა, ჩანაწერის გადაცემაზე უარი ეთქვათ", — ნათქვამია ომბუდსმენის მიერ გავრცელებულ დოკუმენტში.

სახალხო დამცველმა რეკომენდაციით მიმართა ივანე ჯავახიშვილის სახელობის თბილისის სახელმწიფო უნივერსიტეტს, 2020-2021 წლების და შემდგომ სასწავლო სემესტრებში განიხილოს განმცხადებლებთან შრომითი ხელშეკრულების დადების საკითხი. რეკომენდაციის შინაარსია, რომ თსუ-მ შეიმუშაოს შიდა სახელმძღვანელო პრინციპები, რომელიც დაარეგულირებს ლექტორად მოწვევის საკითხს; ასევე, გაატაროს თანასწორობის პოლიტიკა.