დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05

ევროპული საქართველოს წევრი, ზურაბ ჭიაბერაშვილი ქვეყანაში კორონავირუსის გავრცელების საფრთხესთან დაკავშირებით ამბობს, რომ თუ ადამიანები უპასუხისმგებლოდ მოიქცევიან, ვერცერთ მთავრობას ვერ ეყოფა რესურსი. ამის შესახებ ჭიაბერაშვილი ფეისბუქზე წერს.

მისი თქმით, კარანტინისთვის, ვირუსის გამოვლენისთვის, ინფიცირებულთა მკურნალობისა და გართულებულ შემთხვევათა მართვისთვის მოქალაქეებმაც უნდა გამოიჩინონ პასუხისმგებლობა.

"თვეზე მეტია ვამბობ, ეპიდემიის შეკავება დიდწილად დამოკიდებული იქნება ადამინების სოციალური ქცევის შეცვლაზე. თვითიზოლაცია, როდესაც უსიმპტომო ადამიანებიც კი ვერიდებით ზედმეტ კონტაქტს სახლს გარეთ, გახდება ცხოვრების ნორმა. კორონავირუსი ცვლის სამყაროს. მსოფლიო ეკონომიკის დიდი ნაწილი ვირტუალურ რეალობაში გადაეწყობა, რათა ადამიანებს შორის ფიზიკური კონტაქტი შემცირდეს. არ მოგვწონს, მაგრამ მომავალი აქეთ მიდის", — წერს ჭიაბერაშვილი.

როგორც ჭიაბერაშვილი წერს, მთვარობა აზრიანად უნდა მოეკიდოს მწირ რესურსებს და სჯობს, მოკლე, მარტივ ვიდეოკლიპებსა და საზოგადოებრივი ცნობიერების ამაღლებაზე დახარჯოს თანხა, ვიდრე "კუდში სდიოს" პრობლემას. მისივე თქმით, ჯანდაცვის სისტემა გადატვირთვას ვერ გაუძლებს.

ამ ეტაპზე საქართველოში კორონავირუსით ინფიცირების 9 შემთხვევაა დადასტურებული. პირველი 26 თებერვალს დაფიქსირდა, მეორე დაავადებათა კონტროლის ცენტრმა 28 თებერვალს დაადასტურა, მესამე — 29 თებერვალს, მეოთხე — 5 მარტს დილით, დანარჩენი 5 კი ამავე დღეს საღამოს. ამასთანავე, 4 მარტს კორონავირუსი დაუდგინდა იტალიაში მცხოვრებ საქართველოს მოქალაქეს.

წაიკითხეთ NCDC-სა და WHO-ს რეკომენდაციები კორონავირუსის პრევენციის შესახებ:

ამავე თემაზე: