თბილისში ე.წ. ქურდული სამყაროს წევრობისა და მათი წევრისთვის მიმართვის ბრალდებით 4 პირი დააკავეს. ამის შესახებ ინფორმაცია შინაგან საქმეთა სამინისტრო ავრცელებს. მათივე ინფორმაციით, დაკავებულთაგან 3-ს ბრალი ქურდული სამყაროს წევრობისთვის, 1-ს კი წევრისთვის მიმართვაში ედება.

უწყების ინფორმაციით, ერთ-ერთმა დაკავებულმა, ფინანსური დავის გადაწყვეტის მიზნით, ე.წ. ქურდული სამყაროს წევრებს მიმართა, რომლებმაც დავაში საზღვარგარეთ მყოფი ე.წ. კანონიერი ქურდი ჩართეს.

მათივე ცნობით, ე.წ.ქურდული სამყაროს წევრებს შორის სატელეფონო ე.წ. ქურდული გარჩევა შედგა და დავა ერთ-ერთი დაკავებულის სასარგებლოდ გადაწყდა. მოდავე მხარეს კი 4500 ლარის და 6300 აშშ დოლარის ერთი თვის ვადაში გადახდა დაეკისრა. უწყების ინფორმაციით, ე.წ.ქურდული სამყაროს წევრების მხრიდან სისტემატური ზეწოლის შედეგად, აღნიშნულ პირს დაკისრებული თანხის ნაწილი — 4 500 ლარი და 1 800 აშშ დოლარი გამოსძალეს.

გამოძიება ე.წ.ქურდული სამყაროს წევრობისა და ქურდული სამყაროს წევრისთვის მიმართვის საქმეებზე, საქართველოს სისხლის სამართლის კოდექსის 223-ე პრიმა მუხლის 1-ლი ნაწილით და 223-ე მე-4 პრიმა-მუხლით მიმდინარეობს. აღნიშნული დანაშაულები 3-დან 10 წლამდე ვადით თავისუფლების აღკვეთას ითვალისწინებს.