ჟურნალისტი ეკა მიშველაძე საქართველოს პრეზიდენტის პრესსპიკერად დაინიშნა. განკარგულება გიორგი მარგველაშვილმა მიიღო.

საზოგადოებას ახალი პრესსპიკერი 11 მაისს პრეზიდენტის ადმინისტრაციის უფროსმა გიორგი აბაშიშვილმა წარუდგინა და აღნიშნა, რომ მას მედიასთან ხშირი და ინტენსიური ურთიერთობა ექნება:

„ქალბატონ ეკას აქვს სახელმწიფო სექტორში მუშაობის გამოცდილება, ჟურნალისტიკაში მუშაობის 25 წლიანი გამოცდილება და ვფიქრობ, რომ იგი არის ძალიან მნიშვნელოვანი შენაძენი პრეზიდენტის, პრეზიდენტის გუნდისა და მთლიანად პრეზიდენტის ადმინისტრაციისათვის”.

ეკა მიშველაძემ საქართველოს პრეზიდენტსა და ადმინისტრაციას ნდობისთვის მადლობა გადაუხადა და მედიასთან თანამშრომლობის მნიშვნელობასა და ფორმაზეც გააკეთა აქცენტი:

„ჩვენ ერთმანეთს კარგად ვიცნობთ, ვგულისხმობ ყველა იმ ადამიანს ვინც მედიაში მუშაობს, გამომდინარე იქიდან, რომ მე დიდი ხანი ვიყავი ერთ-ერთი თქვენგანი, თუმცა ახლა, გარკვეულ ახალ ეტაპზე გადავა ჩვენი თანამშრომლობა”.

ეკა მიშველაძის თქმით, ქვეყნის პირველი პირის ადმინისტრაციას ახალი გეგმები აქვს, რასაც მედიის წარმომადგენლებს უახლოეს დღეებში წარუდგენს.

ეკა მიშველაძე 1992 წლიდან სხვადასხვა ქართულ არხებზე, ხოლო 2007 წელს ერთი თვით BBC-ზე მუშაობდა. 2009 წლიდან მუშაობდა საზოგადოებრივ მაუწყებელზე და მიჰყავდა საინფორმაციო გამოშვებები და თოქ-შოუები. 2015 წლის ივლისის თვის შემდეგ მისი გადაცემა პირველი სტუდია ეთერში აღარ გასულა, თუმცა ის მომავალი 6 თვე ხელფასს ირებდა. ეკა მიშველაძე საზოგადოებრივი მაუწყებლიდან ოფიციალურად 2016 წლის თებერვალში გაათავისუფლეს.