დაავადებათა კონტროლის ცენტრის ცხელი ხაზი 116 001

დაავადებათა კონტროლის ცენტრის ხელმძღვანელის, ამირან გამყრელიძის თქმით, დღეის, 5 მარტის, მონაცემებით, კორონავირუსის გამო 162 ადამიანია კარანტინში მოთავსებული. ამის შესახებ მან დღეს გამართულ ბრიფინგზე განაცხადა. მისივე თქმით, 31 პაციენტი კი ინფექციურ საავადმყოფოებში რჩება, აქედან 23 თბილისშია, დანარჩენი — ქუთაისსა და ბათუმში.

როგორც გამყრელიძემ თქვა,დღეს დილით ლუგარის ლაბორატორიაში კორონავირუსზე 9 ახალი სინჯი გაიგზავნა.

გამყრელიძემ, ასევე, ისაუბრა, რომ საქართველოსთვის განსაკუთრებულ საფრთხეს წარმოადგენენ მაღალდასენიანებული ქვეყნები: ჩინეთი, სამხრეთ კორეა, ირანი და იტალია. აქედან კი საქართველოსთვის მომატებული საფრთხის შემცველი იტალიაა.

გამყრელიძე კიდევ ერთხელ მოუწოდებს მოქალაქეებს, რომლებიც იტალიიდან ბრუნდებიან, გამოიჩინონ სამოქალაქო პასუხისმგებლობა და არ დამალონ თუ კორონავირუსისთვის დამახასიათებელი სიმპტომები აღენიშნებათ.

ამირან გამყრელიძემ, ასევე, მიმართა იმ ადამიანებსაც, რომლებიც იტალიიდან ბრუნდებიან, რომ სიმპტომების არ არსებობის შემთხვევაში თვითიზოლაციაში დარჩნენ, ხოლო მათ, ვისაც თვითიზოლაციის საშუალება არ აქვთ, აუცილებლად გადავიდნენ კარანტინში და ორკვირიანი დაკვირვების ქვეშ დარჩნენ.

კორონავირუსით ინფიცირების პირველი შემთხვევა საქართველოში 26 თებერვალს დაფიქსირდა, მეორე დაავადებათა კონტროლის ცენტრმა 28 თებერვალს დაადასტურა, მესამე — 29 თებერვალს, მეოთხე შემთხვევა კი 5 მარტს დადასტურდა.

ამასთანავე, 4 მარტს კორონავირუსი დაუდგინდა იტალიაში მცხოვრებ საქართველოს მოქალაქეს.

გაიგეთ მეტი კორონავირუსის პრევენციის შესახებ: