უმრავლესობის ლიდერი, მამუკა მდინარაძე ამბობს, რომ პრეზიდენტ სალომე ზურაბიშვილის ყოველწლიურ საპარლამენტო მოხსენებისგან "მკაფიო" გზავნილებს ელოდება. მისი თქმით, პრეზიდენტის შარშანდელ მოხსენებაშიც ქვეყნის დასავლურ კურსთან დაკავშირებით მკაფიო მესიჯები იყო და წელსაც იმავეს ელის.

"ოპოზიციამ შარშანაც ასე თქვა, რომ რაიმე განსაკუთრებულს არ იტყოდა, მაგრამ იყო ძალიან მკაფიო გზავნილები იყო შარშან და წელსაც ასეთ გზავნილებს ველოდებით. როდესაც საქართველოს კონსტიტუციაში განზასღვრული, რომ ჩვენი კურსია ევროინტეგრაცია და ნატო, ამასთან დაკავშირებით, საკმაოდ მკაფიო მესიჯები გახმოვანდა შარშან და წელსაც დარწმუნებული ვარ იგივე იქნება. ოპოზიციას შეუძლია არც ამას დაესწროს და არც ეს პათოსი გაიზიაროს", — განაცხადა მამუკა მდინარაძემ.

ხვალ, 4 მარტს საქართველოს პრეზიდენტი სალომე ზურაბიშვილი პარლამენტში ყოველწლიური მოხსენებით წარსდგება. ცნობილია, რომ პრეზიდენტის მოხსენებას არ დაესწრებიან ოპოზიციის წარმომადგენლები.

როგორც ნაციონალური მოძრაობის წევრი, თინა ბოკუჩავა ამბობს, იმდენად "მინიმალურია" სალომე ზურაბიშვილის როლი სახელმწიფო ცხოვრებაში, რომ არ გამორიცხავენ, პროტესტიც არ გამოხატონ "ამ ნომინალური ფიგურის" პარლამენტში მისვლის მიმართ.

ევროპული საქართველოს ერთ-ერთი ლიდერის, გიგა ბოკერიას თქმით კი, ზურაბიშვილი ქვეყანას ყოველდღე "პრობლემებს უქმნის საქართველოს თავისი ნაბიჯებით და გამონათქვამებით" და არ იცის, ამჯერადაც მისი მოხსენება კიდევ ერთი ზიანის მომტანი იქნება თუ არა.