დაავადებათა კონტროლის ცენტრის ცხელი ხაზი 116 001

დაავადებათა კონტროლის ეროვნული ცენტრის ხელმძღვანელს, ამირან გამყრელიძის თქმით, ზიარების წესსა და კორონავირუსის პრევენციასთან დაკავშირებით პატრიარქთან შეხვედრას გეგმავს. ამ თემასთან დაკავშირებით ამირან გამყრელიძემ TV პირველის ეთერში ისაუბრა. მან აღნიშნა, რომ საპატრიარქოზე რამის თქმა საკმაოდ რთულია.

"შევთავაზე საპატრიარქოს სამედიცინო სამსახურს, როცა ეს საკითხი გუშინ წინ დაისვა, მე ველოდები, რომ ალბათ ხვალ, ზეგ უწმინდესობას ვეახლო და ამ საკითხზე ვესაუბრო. მინუსად ჩამითვალეს, როცა ვთქვი, რომ ვერ ჩავერევი ათასწლოვან რიტუალში. მე ვერ მივცემ რეკომენდაციას, რომ რამე რიტუალი შეიცვალოს. მე ვიძლევი რეკომენდაციას, რომ საჭიროა ჰიგიენის წესების დაცვა, რომელიც ეხება თვითონ იმ რიტუალსაც", — თქვა ამირან გამყრელიძემ.

ამირან გამყრელიძის თქმით, აუცილებელია ზოგადი ჰიგიენის წესები ყველამ დაიცვას და თუ იქმნება საზოგადოებრივი საფრთხე, ეს ყველამ უნდა გაითვალისწინოს.

დაავადებათა კონტროლის ეროვნული ცენტრის სამეცნიერო ხელმძღვანელმა, პაატა იმნაძემ თქვა, რომ მოსახლეობას აძლევენ რეკომენდაციას არ გამოიყენონ ერთი კოვზი. მისი თქმით, რელიგიურ რიტუალებს ვერ შეცვლიან. ზიარების დროს ერთჯერადი კოვზების გამოყენებას რეკომედაციას გაუწევდა თბილისის ინფექციური საავადმყოფოს დირექტორი თენგიზ ცერცვაძეც. თუმცა, ისიც აღნიშნავს, რომ რელიგიის კომპეტენციაში ვერ ჩაერევა. დაავადებათა კონტროლის ცენტრის ხელმძღვანელი, ამირან გამყრელიძე კი ამბობს, რომ რელიგიურ რიტუალებთან დაკავშირებით რეკომენდაციას ვერ გასცემენ.

29 თებერვალს ცნობილი გახდა, რომ საქართველოს საპატრიარქო საერთო კოვზიდან ზიარების წესის შეცვლას არ აპირებს და კორონავირუსთან დაკავშირებით გავრცელებულ განცხადებაში წერს, რომ სიცოცხლისთვის საშიში ინფექცია აქამდეც არაერთხელ გავრცელებულა. მათი თქმით, ზიარებისთვის ერთი კოვზის გამოყენების პრაქტიკა ათასწლოვან ისტორიას ითვლის, "მორწმუნეები კი ამას არ უშინდებოდნენ".

"საერთო ბარძიმიდან საერთო კოვზით ზიარებას, პირიქით, კიდევ უფრო ხშირად მიეახლებოდნენ, რადგან, როგორც ყველამ ვიცით, წმინდა ზიარებისას ადამიანი იღებს ქრისტეს წმინდა სისხლსა და ხორცს".

ჯანდაცვის მსოფლიო ორგანიზაცია მოუწოდებს მოქალაქეებს, რომ კორონავირუსის თავიდან აცილების მიზნით ჰიგიენა დაიცვან. გარდა ამისა, საქართველოს მთავრობის უწყებათაშორისმა კომისიამ რეკომენდაცია გასცა, რომ საზოგადოებრივი თავშეყრის ადგილებში ხალხმრავალი ღონისძიებები გაუქმდეს.

გაიგეთ მეტი კორონავირუსის პრევენციის შესახებ: