მმართველი გუნდის დეპუტატი ლადო კახაძე კორონავირუსის გამო ზიარებისას ერთჯერადი კოვზების გამოყენებაზე ამბობს, რომ მიკროფონიც მრავალჯერადი გამოყენების საგანია. ამის შესახებ მან აჭარის ტელევიზიის ეთერში ისაუბრა.

"ცალკე თემად ვიტყვი და საპატრიარქოზე მეტ კომენტარს არ გავაკეთებ, ჟურნალისტს მიკროფონი მიაქვს რესპონდენტთან ზუსტად იმ მანძილზე, რომელიც ყველაზე მეტად საშიშია ნერწყვის გადმოდების კუთხით... მიკროფონიც მრავალჯერადი გამოყენების საგანია და ძალიან მარტივად შეიძლება მოხდეს მისი გავრცობა რესპონდენტიდან რესპონდენტზე. ეს არის პრევენცია, არავითარი ჩასაფრება არ არის, პრევენციაა მოვერიდოთ, ან დისტანცია დავიცვათ", — თქვა ლადო კახაძემ.

დეპუტატის განმარტებით, საპატრიარქო დამოუკიდებელი ინსტიტუციაა და გადაწყვეტილებას თავად იღებს.

დაავადებათა კონტროლის ეროვნული ცენტრის სამეცნიერო ხელმძღვანელმა, პაატა იმნაძემ თქვა, რომ მოსახლეობას აძლევენ რეკომენდაციას არ გამოიყენონ ერთი კოვზი. მისი თქმით, რელიგიურ რიტუალებს ვერ შეცვლიან. ზიარების დროს ერთჯერადი კოვზების გამოყენებას რეკომედაციას გაუწევდა თბილისის ინფექციური საავადმყოფოს დირექტორი თენგიზ ცერცვაძეც. თუმცა, ისიც აღნიშნავს, რომ რელიგიის კომპეტენციაში ვერ ჩაერევა. დაავადებათა კონტროლის ცენტრის ხელმძღვანელი, ამირან გამყრელიძე კი ამბობს, რომ რელიგიურ რიტუალებთან დაკავშირებით რეკომენდაციას ვერ გასცემენ.

29 თებერვალს ცნობილი გახდა, რომ საქართველოს საპატრიარქო საერთო კოვზიდან ზიარების წესის შეცვლას არ აპირებს და კორონავირუსთან დაკავშირებით გავრცელებულ განცხადებაში წერს, რომ სიცოცხლისთვის საშიში ინფექცია აქამდეც არაერთხელ გავრცელებულა. მათი თქმით, ზიარებისთვის ერთი კოვზის გამოყენების პრაქტიკა ათასწლოვან ისტორიას ითვლის, "მორწმუნეები კი ამას არ უშინდებოდნენ".

"საერთო ბარძიმიდან საერთო კოვზით ზიარებას, პირიქით, კიდევ უფრო ხშირად მიეახლებოდნენ, რადგან, როგორც ყველამ ვიცით, წმინდა ზიარებისას ადამიანი იღებს ქრისტეს წმინდა სისხლსა და ხორცს".

ჯანდაცვის მსოფლიო ორგანიზაცია მოუწოდებს მოქალაქეებს, რომ კორონავირუსის თავიდან აცილების მიზნით ჰიგიენა დაიცვან. გარდა ამისა, საქართველოს მთავრობის უწყებათაშორისმა კომისიამ რეკომენდაცია გასცა, რომ საზოგადოებრივი თავშეყრის ადგილებში ხალხმრავალი ღონისძიებები გაუქმდეს.

დაავადებათა კონტროლის ცენტრის ცხელი ხაზი 116 001

გაიგეთ მეტი კორონავირუსის პრევენციის შესახებ: