საპარლამენტო უმრავლესობის ლიდერის, მამუკა მდინარაძის განცხადებით, კონსტიტუციაში საარჩევნო ცვლილებების შესატანად ცოტა დრო რჩება და ამით ოპოზიციის "ჭირვეულობაც" დასრულდება. მისი თქმით, მოლაპარაკების რესურსი არსებობს და როდესაც კონსტიტუციაში შესატანი ცვლილებებისთვის დროის ამოწურვა მოახლოვდება, ოპოზიცია მოლაპარაკებების მაგიდას დაუბრუნდება.

"რეალურად, მოლაპარაკების მაგიდასთან ჩვენ კომპრომისული ვარიანტი დავდეთ. მათ სხვადასხვა საბაბის გამოყენებით, საერთოდ დატოვეს მოლაპარაკების მაგიდა. ახლა ჩვენი ევროპელი და ამერიკელი პარტნიორები მოგვიწოდებენ, რომ დავუბრუნდეთ მოლაპარაკებებს. დიახ, ჩვენ ამ მოწოდებას ვუერთდებით და მოვუწოდებთ. მგონია მაინც, რომ რაც უფრო ცოტა დრო რჩება იმისათვის, რომ ცვლილებები შევიდეს კონსტიტუციაში, მით უფრო მეტია შანსი, რომ მოლაპარაკებების მაგიდას მართლაც დაუბრუნდნენ. ოპოზიციის ეს ჭირვეულობა, ჩემი აზრით, დამთავრდება", — განაცხადა მამუკა მდინარაძემ.

მას შემდეგ, რაც ბიძინა ივანიშვილმა პირობა არ შეასრულა და ქართული ოცნების ე.წ. აჯანყებულმა დეპუტატებმა ჩააგდეს საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო, ოპოზიციისა და სამოქალაქო აქტივისტების საერთო პროტესტი დაიწყო. დაპირისპირებული ოპოზიციური ჯგუფები ერთი მოთხოვნის ირგვლივ გაერთიანდნენ — ვადამდელი არჩევნების პროპორციული სისტემითა და ე.წ. გერმანული მოდელით ჩატარება.

პროტესტის ფარგლებში პიკეტირებული იყო მთავარი საკანონმდებლო ორგანო, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

მმართველ გუნდსა და ოპოზიციას შორის საარჩევნო სისტემასთან დაკავშირებით დიპლომატების მედიატორობით მოლაპარაკებების ფორმატი დაიწყო. მოლაპარეკებათა ოთხი რაუნდი უკვე გაიმართა. მმართველი გუნდი ოპონენტებს ახალ სამოქმედო გეგმას სთავაზობს. საუბარია იმაზე, რომ პარლამენტში პროპორციული წესით 100 დეპუტატი აირჩიონ, ნაცვლად 77-სა. ხოლო მაჟორიტარული მანდატები 50-მდე შემცირდება.

თუმცა, მას შემდეგ, რაც ევროპული საქართველოს ერთ-ერთი ლიდერი გიგი უგულავა დაააკავეს, ოპოზიციასა და ხელისუფლებას შორის საარჩევნო სისტემასთან დაკავშირებით მოლაპარაკებები შეყწდა. 18 თებერვალს, ქართული ოცნების გენერალურმა მდივანმა კახა კალაძემ განაცხადა, რომ მმართველი გუნდი ოპოზიციურ პარტიებთან ცალ-ცალკე მოლაპარაკებებს განიხილავს.