ნაციონალური მოძრაობის დეპუტატის, რომან გოცირიძის თქმით, სასამართლო და პროკურატურა "ახირებული ოლიგარქის ხუშტურებს" ემსახურება. მისი თქმით, ოპოზიცია აქციებსა და საერთაშორისო ზეწოლას გააძლიერებს.

"არავინ არ არის ამ ქვეყანაში ილუზიებში. ყველამ დაინახა, თუ ვისთან გვაქვს საქმე. ქვეყანაში არ არსებობს მართლმსაჯულება, სასამართლო სისტემა, პროკურატურა, ყველანი ემსახურებიან ერთი ახირებული ოლიგარქის ხუშტურებს, რომელიც არ არის ადეკვატური. აქვს სია დასაჭერი ადამიანების, დაიწყო ირაკლი ოქრუაშვილით, გიორგი რურუათი, რიგში დგას ბადრი ჯაფარიძე, ნიკა გვარამია, შემდეგ ნიკა მელია, გიგა ბოკერიაზე აღძრეს საქმე. ეს ხომ აბსურდია", — თქვა რომან გოცირიძემ.

დეპუტატის აზრით, არ არსებობს არავითარი სისტემა, რომელიც ივანიშვილის "კრიმინალურ რეჟიმს გადაარჩენს".

თბილისის ყოფილ მერსა და ოპოზიციის ერთ-ერთ ლიდერს, გიგი უგულავას პატიმრობაში ყოფნა ისევ 3 წლით, 2 თვითა და 8 დღით მოუწევს. საქმეზე, რომელზეც უგულავა რამდენიმე წლის წინ მსჯავრდებული იყო, გადაწყვეტილება უზენაესმა სასამართლომ დღეს, 10 თებერვალს გამოაცხადა. საკასაციო საჩივარი ყოფილმა გენერალურმა პროკურორმა და ახლადარჩეულმა მოსამართლემ შალვა თადუმაძემ განიხილა. მასთან ერთად შემადგენლობაში იყვნენ მოსამართლეები, მერაბ გაბინაშვილი და გიორგი შავლიაშვილი.

საქმე ეხება თბილისის განვითარების ფონდის საქმეს, რაზეც გიგი უგულავა და მასთან ერთად ბრალდებული 4 პირი 2018 წლის თებერვალში დამნაშავედ სცეს. გიგი უგულავას პროკურატურა მერობის პერიოდში თბილისის განვითარების ფონდიდან 48 მილიონი ლარის მითვისება-გაფლანგვას ედავება.

2018 წლის თებერვალში თბილისის საქალაქო სასამართლომ თბილისის ყოფილი მერი გიგი უგულავა და მასთან ერთად ბრალდებული ოთხი პირი, ე.წ. ფონდების საქმეში დამნაშავედ ცნო. უგულავას მიუსაჯეს 1 წლითა და 3 თვით თავისუფლების აღკვეთა, თუმცა სხვა საქმეზე გამოტანილმა განაჩენმა ახალი განაჩენი შთანთქა. მას სასჯელი მოხდილად ჩაეთვალა.

ბრალდების მხარე ამტკიცებდა, რომ თბილისის მერმა და ერთიანი ნაციონალური მოძრაობის თბილისის საქალაქო ორგანიზაციის თავმჯდომარემ, გიგი უგულავამ მერიის სხვა მაღალჩინოსნებთან ერთად, შეიმუშავა დანაშაულებრივი სქემა: "თბილისის განვითარების ფონდის კუთვნილი თანხით 2012 წლის ოქტომბრის საპარლამენტო არჩევნებთან დაკავშირებული ერთიანი ნაციონალური მოძრაობის წინასაარჩევნო ხარჯების დასაფინანსებლად".