უკრაინის პრეზიდენტის, ვოლოდიმირ ზელენსკის განცხადებით, ირანმა უკრაინის ავიახაზების ავიაკატასტროფაში დაღუპულთა ოჯახებს 80 ათასი დოლარი შესთავაზა, თუმცა მათ უარი განაცხადეს. ამის შესახებ ზელენსკიმ ТСН-სთან ინტერვიუს დროს ისაუბრა. უკრაინის პრეზიდენტის თქმით, ისინი მეტის გადახდას მოითხოვენ.

"ვფიქრობ, რომ ეს ცოტაა. როდესაც დაღუპულის ცოლი ამბობს, რომ ქმარი ერთადერთი მარჩენალი იყო, მას არ აქვს სამსახური და ბავშვი უნივერსიტეტში აბარებს — 80 ათასი დოლარი ძალიან ცოტაა. თუმცა, რა თქმა უნდა, ადამიანის სიცოცხლე არანაირი ფულით არ იზომება", — განაცხადა ზელენსკიმ.

მისივე თქმით, უკრაინა საერთაშორისო სასამართლოს მიმართავს:

"ჩვენი სახელმწიფოს მხრიდან რაც შეგვეძლო, გავაკეთეთ. თითოეულ ოჯახს 200 ათასი გრივნა (8 ათასი დოლარი) გადავეცით. კომპენსაციის მეორე ნაწილი უკრაინის საერთაშორისო ავიახაზების სადაზღვეო კომპანიებისგანაა. იქ რთული სიტუაციაა, რადგან სადაზღვეო კომპანიებს უჭირს ირანულ მხარესთან თანამშრომლობა, რადგან ირანი სანქციების ქვეშაა".

გარდა ამისა, ვოლოდიმირ ზელენსკი ამბობს, რომ ირანმა თვითმფრინავის შავი ყუთის გასაშიფრად უკრაინელი სპეციალისტები მიიწვია. ის ფიქრობს, რომ სპეციალისტების გამგზავრების შემთხვევაში უკრაინას შავ ყუთს აღარ გადასცემენ:

"მეშინია, რომ ირანელები მიიწვევენ ჩვენს სპეციალისტებს, მოდით, აქ, ადგილზე გავშიფროთ [შავი ყუთი], შემდეგ კი იტყვიან, "ახლა რაში გჭირდებათ შავი ყუთი". არა, ჩვენ ამ ყუთების წამოღება გვინდა და ამაზე ირანის წარმომადგენლებთან გვისაუბრია".

8 იანვარს ირანში უკრაინის საერთაშორისო ავიახაზების თვითმფრინავი ჩამოვარდა და ბორტზე მყოფი ყველა პირი, 168 მგზავრი და 9 ეკიპაჟის წევრი, გარდაიცვალა. დაღუპულთა შორის 7 ქვეყნის მოქალაქეები იყვნენ, მათ შორის უკრაინელები, ირანელები, კანადელები და ბრიტანელები.

ირანმა ოთხდღიანი დაგვიანებით აღიარა, რომ თვითმფრინავი მათ "ადამიანური შეცდომით" ჩამოაგდეს, რაც "ამერიკის ავანტიურიზმმა" გამოიწვია. ირანის შეიარაღებული ძალების გენერალური შტაბის განმარტებით, უკრაინული თვითმფრინავი "მგრძნობიარე" და "კრიტიკულ" ვითარებაში გაფრინდა, მაშინ, როცა ყასემ სოლეიმანის მკვლელობისთვის შურისსაძიებლად ამერიკულ სამხედრო ბაზებს ბომბავდნენ.

ირანის ამ აღიარებამდე საერთაშორისო მედია წერდა, რომ ირანმა უკრაინული თვითმფრინავი შეცდომით ჩამოაგდო. მალევე გავრცელდა ვიდეომასალაც, სადაც შემთხვევა იყო ასახული.

უკრაინულის საერთაშორისო ავიახაზების წარმომადგენლები აცხადებენ, რომ თვითმფრინავი აფრენიდან თითქმის 2 წუთში რადარებიდან გაქრა. მათივე თქმით, მომხდარის გამო გაურკვეველი დროით ირანში ფრენებს შეწყვეტენ.

კომპანიის ტექნიკური დირექტორის განცხადებით, ბოინგი 2016 წელს გამოშვებულია და ბოლო ტექნიკური შემოწმება 6 იანვარს გაიარა. მისი თქმით, შემოწმებისას პერსონალს არანაირი ტექნიკური ხარვეზი არ აღმოუჩენია და არც ეკიპაჟს უცნობებია რაიმე სახის პრობლემაზე. მისივე თქმით, ეს ბოინგი ერთ-ერთი საუკეთესო იყო მათ შორის, რაც კომპანიას გააჩნდა.