BBC-ის ცნობით, ჰონგ-კონგში, სადაც კორონავირუსის 15 დადასტურებული შემთხვევაა, საავადმყოფოს ასობით თანამშრომელი ჩინეთთან საზღვრის ჩაკეტვის მოთხოვნით გაიფიცა. მათი თქმით, ეს შეამცირებს ვირუსის გავრცელების რისკს.

მანამდე, ჰონგ-კონგმა შეაჩერა სარიკინიგზო და საზღვაო მომსახურება, თუმცა საავადმყოფოს პერსონალი ითხოვს, სრულად ჩაიკეტოს საზღვარი. ხელისუფლებაში აცხადებენ, რომ საზღვრის ჩაკეტვა ჯანდაცვის მსოფლიო ორგანიზაციის რეკომენდაციას ეწინააღმდეგება.

"თუკი საზღვარს სრულად არ ჩაკეტავთ, ადამიანური რესურსი, დამცავი აღჭურვილობა და იზოლირებული ოთახები არ გვეყოფა ეპიდემიის აფეთქებასთან საბრძოლველად", — ამბობს საავადმყოფოს თანამშრომელთა ალიანსის თავმჯდომარე, ვინი იუ.

ალიანსის წევრების განცხადებით, მოთხოვნის დაუკმაყოფილებლობის შემთხვევაში, ხვალიდან, 4 თებერვლიდან გაფიცვას წინა ხაზზე მომშავე ექიმები და მედდებიც შეუერთდებიან.

ჰონგ-კონგი ჩინეთის ნაწილია, თუმცა ინარჩუნებს ავტონომიას. ორ ქვეყანას შორის საზღვარი ისეთივეა, როგორც საერთაშორისო გამშვებ პუნქტებზე. გადაადგილების აკრძალვასთან ერთად ჩინეთმა შეწყვიტა ვიზების გაცემა ჰონგ კონგში წამსვლელთათვის.

მსოფლიოს რიგმა ქვეყნებმა ჩინეთიდან ჩამსვლელი მგზავრებისთვის საზღვრები ჩაკეტა. პირველ თებერვალს ცნობილი გახდა, რომ უცხო ქვეყნის მოქალაქეს, რომელიც ბოლო პერიოდში ჩინეთში იყო, აშშ-სა და ავსტრალიაში არ შეუშვებენ. მანამდე, მსგავსი აკრძალვა დააწესა რუსეთმა, იაპონიამ, პაკისტანმა და იტალიამ.

მსოფლიო ჯანდაცვის ორგანიზაცია მსგავსი ზომების წინააღმდეგია და აცხადებს, რომ მოგზაურობის აკრძალვას მეტი ზიანის მოტანა შეუძლია, ვიდრე სიკეთის. მათი თქმით, ეს დააზიანებს ეკონომიკას და გაართულებს ინფორმაციის გაზიარებას. WHO-ს რეკომენდაციაა, დაიწყოს სამედიცინო სკრინინგი სასაზღვრო გამშვებ პუნქტებში.