დაავადებათა კონტროლის ეროვნული ცენტრი (NCDC) დეზინფორმაციას უწოდებს სოციალური ქსელებით გავრცელებულ ხმოვან შეტყობინებას კორონავირუსზე და აცხადებს, რომ ამ ეტაპისთვის საქართველოში ახალი ინფექციის არც ერთი შემთხვევა არ დაფიქსირებულა. უწყების ცნობით, ხმოვანი გზავნილი ემსახურება არაკეთილსინდისიერი ადამიანების კერძო, მერკანტილურ ინტერესებს:

"ვრცელდება სრულიად დაუსაბუთებელი, უპასუხისმგებლო და დანაშაულებრივი ხმოვანი გზავნილი... ვთხოვთ მოსახლეობას ნუ აყვება პანიკას! საქართველოს სახელმწიფო ყველაფერს აკეთებს, რათა მოხდეს ქვეყნის ტერიტორიაზე ახალი კორონავირუსის შემოტანისა და გავრცელების პრევენცია. ქვეყნის ჯანდაცვის სისტემა სრულ მზადყოფნაშია და შეუძლია დაავადების შემოტანის შემთხვევაში უზრუნველყოს გადაუდებელი სამედიცინო დახმარება თანამედროვე საერთაშორისო სტანდარტების შესაბამისად".