დაავადებათა კონტროლის ცენტრის სამეცნიერო საბჭოს თავმჯდომარის, პაატა იმნაძის თქმით, ყაზბეგიდან თბილისში გადაყვანილი პირებს კორონავირუსის ნიშნები არ აღენიშნებათ. მისი თქმით, მხოლოდ 2 ბავშვს ჰქონდა სიცხე, თუმცა ვირუსზე "საეჭვოები არ არიან" და "არ ჯდებიან სტანდარტულ განსაზღვრებაში". მისივე თქმით, პაციენტები ინფექციურ საავადმყოფოში პრევენციისთვის გადაიყვანეს, რადგან ქვეყანაში "პანიკაა".

ინფექციური საავადმყოფოს წარმომადგენლის განცხადებით, ყაზბეგიდან ჩასული 9-პირიანი ჯგუფიდან მხოლოდ 2 ბავშვს აქვს ტემპერატურა. მათი თქმით, ჩაატარებენ პროტოკოლით გათვალისწინებულ ყველა პროცედურას იმისთვის, რომ დადგინდეს ეს არის ჩვეულებრივი რესპირაციული ინფექცია თუ ახალი კონორავირუსი.

მისივე თქმით, ამ ეტაპზე ბავშვები და კიდევ ერთი პაციენტი, საქართველოს მოქალაქე, რომელიც ჩინეთიდან დაბრუნდა და ტემპერატურა აქვს, ბოქსირებულ განყოფილებაში იმყოფებიან და კვლევა უტარდებათ. ექიმი განმარტავს, რომ გარდა სააავდმყოფოში ჩატარებული პროცედურებისა, მათი ანალიზი გაიგზავნება ლუგარის ლაბორატორიაშიც.

ჩინეთში კორონავირუსით გარდაცვლილთა რიცხვი 170-მდე გაიზარდა, დაინფიცირებულთა რაოდენობა კი 7 700-ზე მეტია. ბოლო მონაცემებით, ვირუსი ჩინეთის 31 რეგიონში გავრცელდა და მთელი ქვეყანა მოიცვა.

კორონავირუსის შემთხვევა 10-ზე მეტ ქვეყანაში გამოვლინდა, მათ შორის: სამხრეთ კორეაში, იაპონიაში, ტაილანდში, მალაიზიაში, ნეპალში, ვიეტნამში, აშშ-ში, საფრანგეთში, გერმანიაში, ავსტრალიაში, კანადასა და შრილანკაში.

გაიგეთ მეტი: