დაავადებათა კონტროლის ცენტრის დირექტორის, ამირან გამყრელიძის განცხადებით, კორონავირუსზე ინფორმაციის გასავრცელებლად ონლაინლექციები დაიწყება, რომელსაც ეპიდემიოლოგები და ინფექციური საავადმყოფოს ხელმძღვანელი ჩაწერენ. მისი თქმით, ვიდეოები ცენტრალური ინფექციური საავადმყოფოს ვებ-გვერდზე გამოქვეყნდება.

"კარგად იქნება ახსნილი ამ დაავადების შესახებ ყველაფერი და სასურველია, რომ ეს ყველამ ნახოს და გააზიაროს", — განაცხადა მან.

გამყრელიძის განმარტებით, სახელმწიფო პრევენციისთვის სხვადასხვა ნაბიჯებს დგამს და სამედიცინო ქსელი მზადყოფნაშია, სხვადასხვა უწყებები კი კოორდინირებულად მუშაობენ.

"არსებობს საკმარისი რაოდენობა პირადი დაცვის საშუალებებისა, რომლითაც სამედიცინო პერსონალმა უნდა იმუშაონ დაინფიცირებულ ადმიანთან", — განაცხადა მან.

მისივე თქმით, ჩინეთიდან ჩამოსულ ყველა მგზავრს ურიგდება სპეციალური სამენოვანი ბუკლეტი, რომელიც შესაძლო სიმპტომებზე აწვდის მათ ინფორმაციას და გამოვლენის შემთხვევაში ცხელი ხაზის ნომერსაც სთავაზობს.

გამყრელიძე ხაზს უსვამს იმ ფაქტს, რომ კორონავირუსის შემთხვევა სერიოზული ეპიდაფეთქებაა, მაგრამ ამ ეტაპზე საქართველოში ვირუსის შემთხვევა არ დაფიქსირებულა.

"პანიკის საფუძველი არ არის, მაგრამ სერიოზული სიფრთხილე და სერიოზული მზადება ქვეყანაში უნდა იყოს", — განაცხადა მან.

ჩინეთში კორონავირუსით გარდაცვლილთა რიცხვი 170-მდე გაიზარდა, დაინფიცირებულთა რაოდენობა კი 7 700-ზე მეტია. ბოლო მონაცემებით, ვირუსი ჩინეთის 31 რეგიონში გავრცელდა და მთელი ქვეყანა მოიცვა.

კორონავირუსის შემთხვევა 10-ზე მეტ ქვეყანაში გამოვლინდა, მათ შორის: სამხრეთ კორეაში, იაპონიაში, ტაილანდში, მალაიზიაში, ნეპალში, ვიეტნამში, აშშ-ში, საფრანგეთში, გერმანიაში, ავსტრალიაში, კანადასა და შრილანკაში.

გაიგეთ მეტი: