საქართველოს მთავრობამ გაასაჯაროა 4 ამერიკელი კონგრესმენის მიერ პრემიერ გიორგი გახარიასთვის მიწერილი წერილი. წერილში კონგრესმენები ეხმიანებიან სხვადასხვა საკითხს, მათ შორის ანაკლიის პორტს, ოპოზიციის ლიდერების წინააღმდეგ მიმდინარე გამოძიებებსა და არჩევნებს.

წერილის დასაწყისში კონგრესმენები აღნიშნავენ, რომ პირველი წერილის შემდეგ გახარიასგან მიიღეს პირობა არჩევნები უმაღლესი სტანდარტით ჩატარების შესახებ. თუმცა მათი თქმით, აქვთ ინფორმაცია იმაზე, რომ ფეისბუქმა წაშალა ანგარიშები, რომელსაც მმართველი გუნდი აფინანსებდა. კონგრესმენებს მიუღებლად მიაჩნიათ ის ფაქტი, რომ ამ გვერდებზე ვრცელდებოდა ანტიდემოკრატიული და ანტიდასავლური განცხადებები.

გარდა ამისა, კონგრესმენები აცხადებენ, რომ ამერიკულ და ევროპულ კომპანიებს საქართველოში ავიწროვებენ, რაც აშშ-ში საქართველოს იმიჯზე უარყოფითად აისახება. ამასთან დაკავშირებით, ისინი შეშფოთებას გამოთქვამენ ანაკლიის პორტის საკითხის პოლიტიზების გამო. მათი თქმით, აშშ-ს მხარდაჭერის მქონე ანაკლიის კონსორციუმის პოლიტიკურ სამიზნედ ქცევამ აშშ-ს ინვესტიციებს შეუშალა ხელი.

კონგრესმენები შეშფოთებას გამოთქვამენ იმის გამოც, რომ განახლდა ძველი საქმეები ოპოზიციის ლიდერების წინააღმდეგ.

"დემოკრატიის გასაღები არის სამართლის პატივისცემა და გამართული სასამართლო სისტემა, ასევე, თავისუფალი არჩევნების ჩატარება რომელიც თქვენი პარტიის დაპირება იყო", — წერენ ისინი.

წერილის ბოლოს კონგრესმენები იმედს იტოვებენ, რომ საქართველოს მთავრობა გააგრძელებს მუშაობას ამერიკის კონგრესთან, ახალ ელჩ კელი დეგნანთან, ევროკავშირთან და არასმთავრობო ორგანიზაციებთან ერთად რომ გააძლიეროს დემოკრატიული ინსტიტუტები და ააყვავოს ეკონომიკა ქართველი ხალხისთვის. წერილში აღნიშნულია, რომ ისინი პასუხს ელიან.

ფოტო: საქართველოს მთავრობა

წერილის შესახებ ინფორმაცია თავდაპირველად ერთ-ერთმა ავტორმა, აშშ-ის კონგრესის წარმომადგენელთა პალატის საქართველოს ჯგუფის თანათავმჯდომარე, რესპუბლიკელმა ადამ კინზინგერმა გაავრცელა. განცხადებას ხელს კიდევ სამი კონგრესმენი აწერს.

კონგრესმენებმა გიორგი გახარიას წერილი ერთი თვის წინ, დეკემბერშიც გამოუგზავნეს, სადაც პროპორციულ სისტემაზე გადასვლის დაპირების შეუსრულებლობას აკრიტიკებენ და გაოგნებას გამოხატავდნენ.

კიდევ ერთი კონგრესმენი, რომელმაც გახარიას 13 იანვრით დათარიღებული წერილი გამოუგზავნა რესპუბლიკელი მარკვეინ მალინია. მალენიც დემოკრატიული ღირებულებებისგან გადახვევისა და ეკონომიკური მდგომარეობის გაუარესების გამო თავის შეშფოთებას გამოხატავდა. ასევე, დაპირებული რეფორმის შეუსრულებლობასთან დაკავშირებით მისი კოლეგებს აზრს იზიარებდა.