ტაბულას დამფუძნებელი თამარ ჩერგოლეიშვილი საერთაშორისო ლიდერების პროგრამაში მიიღებს მონაწილეობას. გამოცემის ინფორმაციით, ის დიდი ბრიტანეთის მთავრობამ მიიწვია.

საერთაშორისო ლიდერების პროგრამის მიზანია სხვადასხვა ქვეყნების ლიდერების დაახლოება ერთანეთთან და დიდ ბრიტანეთთან, სამომავლო თანამშრომლობის ჩამოსაყალიბებლად და პოზიტიური გამოცდილებების გასაზიარებლად.

როგორც ჩერგოლეიშვილმა On.ge-სთან საუბრისას განმარტა, პროგრამა მოიცავს როგორც პერსონალიზებულ, ასევე ზოგად ნაწილს. რაც იმას გულისხმობს, რომ შეხვედრები გაიმართება დიდი ბრიტანეთის მთავრობასთან, პარლამენტთან, სამოქალაქო საზოგადოების წარმომადგენლებთან და იმ პირებთან, რომლებიც მისი დაგეგმილი პროექტების განხორციელებაში ჩაერთვებიან.

"პროექტში მიღებულ გამოცდილებას გამოვიყენებ პროდასავლური მედიის გასაძლიერებლად და რუსული პროპაგანდის წინააღმდეგ ეფექტური ზომების მისაღებად, ეს არის მთავარი ამოცანა", — განაცხადა მან.

საერთაშორისო ლიდერების პროგრამა 2013 წელს დაიწყო და მასში ასეულობით ლიდერმა მიიღო მონაწილეობა. სხვადასხვა პერიოდში საქართველოდან პროგრამაში მონაწილეობდნენ ქართული ოცნების ყოფილი დეპუტატები სოფიო ქაცარავა და თამარ ჩუგოშვილი.