ქართული ოცნების ვიცე-სპიერი, მამუკა მდინარაძე მოძრაობა #სირცხვილიას პერფორმანსის შეფასებისას სექსისტურად საუბრობს. მისი თქმით, რაც პარლამენტში მოხდა უნიჭო, გოიმური დადგმაა. მამუკა მდინარაძის აზრით, რამის დადგმა თუ უნდათ ეს მამაკაცებმა უნდა გააკეთონ.

"კაცებიც არ ჰყავთ, რომ თუ რამე პერფორმანსის დადგმა მაინც უნდათ ეს კაცებმა, მამაკაცებმა, გააკეთონ, ქალებს უშვებენ რაღაცა უნიჭო, მდაბიო, გოიმური პერფორმანსების დასადგმელად, სირცხვილი სინამდვილეში არის ეს", — თქვა მამუკა მდინარაძემ.

დღეს, 12 დეკემბერს, პარლამენტში პლენარული სხდომის დარბაზში სპეციფიური სუნის გამო შესვენება გამოცხადდა. ქართული ოცნების დეპუტატები ამბობდნენ, რომ ოპოზიციის ორმა წარმომადგენელმა უცნობი ნივთიერება დაასხა. სუნის გამო ცუდად გახდა დეპუტატი ენძელა მაჭავარიანი. პარლამენტში გამოიძახეს პოლიცია და სასწრაფო დახმარება. მოგვიანებით, სამოქალაქო მოძრაობა #სირცხვილიამ სხდომათა დარბაზში დაყენებული სუნის გამო პასუხისმგებლობა აიღო.

პარლამენტს დღეს უზენაესი სასამართლოს მოსამართლეთა სიისთვის კენჭი უნდა ეყარა.

განახლება: 12 დეკემბრის მოვლენები მოკლედ

დღეს, 12 დეკემბერს სამოქალაქო მოძრაობის აქტივისტებმა და პოლიტიკური პარტიის წარმომადგენლებმა პარლამენტის შესასვლელების პიკეტირება სცადეს, თუმცა დეპუტატები საკანონმდებლო ორგანოში მაინც შევიდნენ. აქციაზე პოლიციამ ჯამში 16 პირი დააკავა.

პარლამენტის უპარტიო დეპუტატი, ეკა ბესელია ამბობდა, რომ მოსამართლეთა არასასესიო კვირაში არჩევა პარლამენტის რეგლამენტს ეწინააღმდეგებოდა. ის რამდენიმე წუთის განმავლობაში კომიტეტის თავმჯდომარეს არ აძლევდა საშუალებას კანდიდატურები განეხილათ.

პროცესის ჩასაშლელად კენჭისყრის დაწყებამდე რამდენიმე წუთით ადრე პლენარულ სხდომათა დარბაზში გაურკვეველი ნივთიერება გაუშვეს, რამდენიმე ადამიანი ცუდად გახდა. ამ მიზეზით სხდომათა დარბაზი დაატოვებინეს დეპუტატებს და კენჭისყრამ რამდენიმე საათით გადაიწია. საქმეზე გამოძიება შსს-მ სისხლის სამართლის კოდექსის 117-ე მუხლით დაიწყო. ამ მუხლით ჯანმრთელობის განზრახ მძიმე დაზიანება მინიმუმ 3-წლიანი პატიმრობით ისჯება. ქართულმა ოცნების ერთ-ერთმა დეპუტატმა მომხდარი ტერორისტულ აქტად, დანარჩენებმა კი ქიმიურ თავდასხმად შეაფასეს. მომხდარზე პასუხისმგებლობა #სირცხვილიამ აიღო.

საბოლოოდ, კენჭისყრა მაინც ჩატარდა და ქართულმა ოცნებამ 14 მოსამართლე უზენაეს სასამართლოში უვადოდ დანიშნა.