საქართველოს სახალხო დამცველის ინფორმაციით, 2019 წელს ციხეში კრიმინალური სუბკულტურისა და არაფორმალური მმართველობის ფორმების მანკიერი პრაქტიკა გამოიკვეთა. ამის შესახებ ომბუდსმენმა მედიას ინფორმაცია მიაწოდა.

"მონიტორინგის პროცესში, თავისუფლებაშეზღუდულ პირებთან და დაწესებულებების თანამშრომლებთან კომუნიკაციის შედეგად დგინდება არაფორმალური მმართველობის სისტემური ხასიათი, რაც კონკრეტული პატიმრების პრივილეგირებულ მდგომარეობაში ჩაყენებასა და დავის გადაწყვეტის არაფორმალური გზების არსებობას ადასტურებს", — განაცხადა სახალხო დამცველმა, ნინო ლომჯარიამ.

მისივე თქმით, არაფორმალური მმართველობის და პენიტენციურ დაწესებულებებში მოთავსებული ცალკეული პირებისთვის პრივილეგირებული მდგომარეობის პრობლემებზე ევროპის საბჭოს წამების პრევენციის ევროპული კომიტეტიც (CPT) აღნიშნავდა.

საქართველოს კანონმდებლობით, პენიტენციური სამსახური საქართველოს იუსტიციის სამინისტროს დაქვემდებარებაშია. იუსტიციის მინისტრი, თეა წულუკიანი სახალხო დამცველის ანგარიშს ლეგენდებს უწოდებს.

"მინდა სახალხო დამცველის შემოთავაზებით ვისარგებლო და მას შევთავაზო, 15 დაწესებულებიდან ნებისმიერში, მათ შორის ე.წ. ზონებში მასთან ერთად ვიზიტი გავმართო... არანაირი კრიმინალური მმართველობა სასჯელაღსრულების დაწესებულებებში არ არის, მას მართავს სახელმწიფო", — თქვა წულუკიანმა.

პენიტენციური სამსახურის პრესსამსახურმა ციხეების გადასაღებად მედიასაშუალებების ნაწილი მიიწვია. მათ შორის ვერ მოხვდნენ ხელისუფლების მიმართ კრიტიკული მედიასაშუალებები: TV პირველი, ფორმულა და მთავარი არხი. პენიტენციური სამსახურიდან შეთავაზება არ მიუღია არც On.ge-ს. პრესსამსახურთან მედიასაშუალებისგან პრეტენზიის მოსმენის შემდეგ სატელეფონო კავშირი შეწყდა, მან კი ტელეფონს აღარ უპასუხა.