დონალდ ტრამპის ადმინისტრაცია ნატოს კოლექტიურ ბიუჯეტში ამერიკის შეერთებული შტატების კონტრიბუციის მნიშვნელოვნად შემცირებას გეგმავს, დაზოგილი თანხით კი ევროპაში, საქართველოსა და უკრაინას დაეხმარება. ამის შესახებ CNN ამერიკელ მაღალჩინოსნებზე და ნატოს დიპლომატზე დაყრდნობით წერს.

საუბარია საორგანიზაციო ხარჯების ბიუჯეტის 22 პროცენტიდან 16 პროცენტამდე შემცირებაზე. ამით ის თითქმის გაუთანაბრდება გერმანიის შენატანს, რაც 14,8 პროცენტია. წევრი ქვეყნების კონტრიბუცია მათი მთლიანი ეროვნული პროდუქტის შესაბამისად განისაზღვრება.

"ახალი ფორმულა მიმდინარე კვირაში დამტკიცდა თეთრ სახლში. აშშ ნატოში დაზოგილი თანხით გეგმავს, ევროპაში შეერთებული შტატების სამხედრო თუ უსაფრთხოების ძალისხმევებს შეუწყოს ხელი. აშშ ამით განახორციელებს პროგრამებს ნატოს არაწევრ ქვეყნებში, საქართველოსა და უკრაინაში, რომლებიც მიიჩნევიან, რომ რუსეთის წინა ხაზზე დგანან", — წერს CNN.

ნატოს პირდაპირი ბიუჯეტი შედარებით მცირეა და 2,5 მილიარდ აშშ დოლარს შეადგენს. იგი განსხვავდება ეროვნული თავდაცვის ბიუჯეტიდან, სადაც ნატოს რეკომენდაციაა წევრის მიერ მთლიანი შიდა პროდუქტის 2 პროცენტის კონტრიბუცია.