დღეს, ცენტრალურ საარჩევნო კომისიაში სხდომა გაიმართა. სხდომაზე ცესკომ არჩევნების მეორე ტურის თარიღები და ბიუჯეტი დანიშნა. მეორე ტური 30 ოქტომბერს, 48 საარჩევნო ოლქში გაიმართება.

ცესკოს პრესსპიკერის, ანა მიქელაძის განცხადებით, 36-ე და 48-ე საარჩევნო მაჟორიტარულ ოლქებზე მეორე ტურის ჩატარების საკითხს განმეორებითი კენჭისყრა გადაწყვეტს, რომელიც 22 ოქტომბერს გაიმართება:

"რაც შეეხება ზუგდიდის მუნიციპალიტეტის გამგებლის არჩევნებს, იქ ჯერ გაიმართება განმეორებითი კენჭისყრა და განმეორებითი კენჭისყრის შედეგების მიხედვით გადაწყდება უნდა გაიმართოს თუ არა მეორე ტური".

ცესკომ განმეორებითი კენჭისყრისა და მეორე ტურის ბიუჯეტი დაახლოებით ექვსი მილიონი ლარის ოდენობით დაამტკიცა:

"ცენტრალური საარჩევნო კომისიის მიერ მიღებული იყო სამართლებრივი აქტი და განისაზღვრა სავარაუდო ბიუჯეტი, რაც საჭირო იქნება მეორე ტურების და ასევე განმეორებითი კენჭისყრის ჩატარებისათვის. განისაზღვრა დაახლოებით 6 მილიონი ლარის ოდენობით"

გარდა ამისა, დღეს, ცენტრალურმა საარჩევნო კომისიამ დანიშნა ახალციხის მერის არჩევნების მეორე ტური და ბოლნისისა და ხარაგაულის მუნიციპალიტეტის გამგებლის არჩევნების მეორე ტური, რომელიც ასევე 30 ოქტომბერს გაიმართება.