დემოკრატიული მოძრაობა — ერთიანი საქართველოს ლიდერი, ნინო ბურჯანაძის თქმით, ქართული ოცნების განცხადებებითა და შემოთავაზებებით საზოგადოებას და ქვეყანას დასცინის. ამის შესახებ ბურჯანაძემ ლეიბორისტული პარტიის ოფისში ოპოზიციის შეხვედრის შემდეგ განაცხადა.

"აი, ასე ღიად განცხადება, რომ ვინც გაიყიდებით, გაგვირიგდებით, დაშლით ამ ერთობას, იმათ ერთ ან ორ კაცს პარლამენტში გაგაყვანინებთო... კარგით მართლა ხალხნო რა? ასე შეიძლება ხალხს დასცინოთ? შეიძლება აბუჩად აიგდოთ საქართველო? არ გამოვა ასე. არ გაჩერდებიან ის ახალგაზრდები. აი, სულ რო გავგიჟდეთ პოლიტიკური პარტიები და მართლა წამოვიდეთ ეგეთ გარიგებაზე და ხელი ავიღოთ სინდისზე და ნამუსზე, ახალგაზრდები არ გაჩერდებიან", — განუცხადა ნინო ბურჯანაძემ TV პირველს.

დღეს, 25 ნოემბერს უმრავლესობის სხდომის შემდეგ ქართული ოცნების გენერალურმა მდივანმა, კახა კალაძემ განაცხადა, რომ "თემა დახურულია" და 2020 წელს არჩევნები შერეული სისტემით ჩატარდება. ამასთანავე კალაძემ აღნიშნა, რომ 2020 წლის არჩევნებში არ ეყოლებათ მაჟორიტარი კანდიდატი იქ, სადაც "ნაციონალური მოძრაობის ორი ძირითადი ფრთისა და მისი დანამატების გარდა" სხვა ოპოზიციური პარტიებს ან დამოუკიდებელ კანდიდატებს ექნებათ "გამარჯვების რეალური შანსი".

და ბოლოს, კახა კალაძის ნათქვამიდან ირკვევა, რომ შესაძლოა 2024 წლის არჩევნებიც არ ჩატარდეს სრულად პროპორციული წესით. საარჩევნო რეფორმის საკითხი საერთ-სახალხო კენჭისყრაზე 2020 წლის საპარალამენტო ან 2021 წლის ადგილობრივი არჩევნების დღეს დადგება. თუმცა, კალაძეს არ დაუკონკრეტებია უშუალოდ რა საკითხი დადგება სახალხო კენჭისყრაზე.