ქუთაისში მოძრაობა #სირცხვილიას და #შეცვალეს აქტივისტებმა ოპოზიციური პარტიების მხარდამჭერებთან ერთად საპროტესტო აქცია გამართეს. ისინი პროპორციული საარჩევნო სისტემის ჩაგდებას აპროტესტებდნენ და მაჟორიტარებს მიმართავდნენ.

ფოტო: კადრი ვიდეოდან / რუსთავი 2

აქციის მონაწილეებს თან ჰქონდათ სტაფილო, რომლებზეც მაჟორიტარი დეპუტატების სახელები ეწერათ. რუსთავი 2-ის ინფორმაციით, მათ სიმბოლურად, მერიის შენობას ბოქლომიც დაადეს.

ფოტო: კადრები ვიდეოდან / რუსთავი 2

პროტესტი დაპირისპირებაში გადაიზარდა, როდესაც ქართული ოცნების მხარდამჭერებმა განაცხადეს, რომ ნაციონალურ მოძრაობას აქციების გამართვის უფლება არ აქვს. რამდენიმე ადამიანი ერთმანეთს ჯერ სიტყვიერად, შემდეგ კი ფიზიკურად დაუპირისპირდა.

პროპორციული საარჩევნო სისტემის კანონპროექტის ჩავარდნის გამო საქართველოში უკვე რამდენიმე დღეა საპროტესტო აქციები იმართება. პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ სპეცრაზმისა და წყლის ჭავლის გამოყენებით გახსნა.

ბოლო დღეების მოვლენები მოკლედ

ამჟამად პარლამენტის შენობა ბლოკირებული აღარ არის. აქციის მონაწილეები ამბობდნენ, რომ არ შეუშვებდნენ არც ერთ დეპუტატს. შესასვლელებში გაშლილი იყო კარვები და დააწყეს ტომრები, ევროპულმა საქართველომ ყველა შესასვლელ ჭიშკარს სიმბოლურად ბოქლომი დაადო.

ასევე, პიკეტი მოხსნეს პარლამენტის შესასვლელებს. აქციის დაშლისას მინიმუმ 37 ადამიანი დააკავეს. ამ ოპერაციის შემდეგ დეპუტატები პარლამენტში შევიდნენ და ბიუროს სხდომა გამართეს.

აქცია თბილისის ქუჩებში მას შემდეგ იმართება, რაც ბიძინა ივანიშვილის დაპირება არ შესრულდა. მმართველმა პარტიამ ჩააგდო საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო. მმართველი პარტიის ამ გადაწყვეტილებამ ოპოზიციური პარტიები საერთო მოთხოვნის ირგვლივ გააერთიანა. მოთხოვნას იზიარებენ სამოქალაქო სექტორის წარმომადგენლები და მოძრაობა ქვეყნის სამსახურში.