ანტისაოკუპაციო მოძრაობა ძალა ერთობაშიას ლიდერი დათო ქაცარავა აცხადებს, რომ მისი და მოძრაობის სხვა წევრების დაკავება იგეგმება. ქაცარავა ამბობს, რომ შიდა წყაროს ინფორმაციით, მათ იარაღის ან ნარკოტიკული საშუალების ჩადებას უპირებენ.

"მოძრაობის არცერთი წევრი არ ფლობს უკანონო იარაღს, გარდა რეგისტრირებულისა. მე მაქვს რეგისტრირებული იარაღი და ნებისმიერ წუთს შეუძლიათ წამობრძანდნენ ძალოვან სტრუქტურებს და შეამოწმონ ჩემი მანქანა და სახლი. არ ვეტანებით არანაირ ნარკოტიკს", — განაცხადა მან სახელმწიფო უსაფრთხოების სამსახურის წინ.

ქაცარავა თანამებრძოლებთან ერთად რამდენიმე თვის განმავლობაში ოკუპირებულ სოფლებში პატრულირებდა. ისინი ღამეებს ათევდნენ საოკუპაციო ხაზის მიმდებარედ და აკვირდებოდნენ საოკუპაციო რეჟიმის წარმომადგენლებს.