ქართული ოცნების უმრავლესობის ლიდერმა, გია ვოლსკიმ 18 ნოემბრის ბიუროს სხდომაზე აქციის დაშლის დროს მედიის მუშაობაზე გაამახვილა ყურადღება. მას არ დაუკონკრეტებია მედიასაშუალება, თუმცა მათი ნაწილი "ნაცმოძრაობის პროპაგანდისტულ ქვეგანყოფიულებად" მოიხსენია:

"ამდენი მედია პრინციპულად იქცა ნაცმოძრაობის პროპაგანდისტულ ქვეგანყოფილებად, თითქოსდა მათი არსებობა იქნებოდა შესაძლებელი, თავიანთი პოლიტიკური პროფილით, რომ არა მედიათავისუფლება. ძალიან დიდი ოდენობით არასწორი ინფორმაცია მიეწოდება ხალხს. იმ იმედით რომ უმეცრება გადააჭარბებს ცოდნას".

სპეცრაზმელებმა პარლამენტის ცენტრალურ შესასვლელთან აქციის დასაშლელად წყლის ჭავლი გამოიყენეს, მოგვიანებით კი რუსთაველის გამზირზე ჩავიდნენ და მიწოლით გაათავისუფლეს საავტომობილო გზა. ასევე, პიკეტი მოხსნეს პარლამენტის შესასვლელებს. აქციის დაშლისას მინიმუმ 18 ადამიანი დააკავეს. ამ ოპერაციის შემდეგ დეპუტატები პარლამენტში შევიდნენ და ბიუროს სხდომა გამართეს.