"გია ვოლსკისთან მივდივარ შეხვედრაზე და 6 საათზე უნდა ვიყო ქორწილში" — განაცხადა მმართველი პარტიის დეპუტატმა, სიმონ ნოზაძემ, რომელიც ქართული ოცნების ოფისში მივიდა. დეპუტატის განცხადებას პირველი არხი ავრცელებს.

ნოზაძე ბოლო პერიოდში განვითარებულ მოვლენებსა და დღეს დაგეგმილ აქციებსაც გამოეხმაურა. მისი თქმით, მმართველმა გუნდმა და ოპოზიციამაც პასუხისმგებლობა უნდა აიღონ ქვეყანაში არსებულ ვითარებაზე.

"ქვეყანა მშვიდობიანი გზით უნდა მივიდეს 2020 წლის არჩევნებამდე. პროტესტს კი ჰქონდეს მშვიდობიანი ფორმა. არ შეიძლება ვითარების ესკალაცია", — განაცხადა ნოზაძემ.

დღეს, 17 ნოემბერს, 15 საათზე პარლამენტთან საპროტესტო აქცია. აქციის ორგანიზატორები სხვადასხვა სამოქალაქო მოძრაობა და ოპოზიციური პარტიები არიან. გარდა ამისა, 17 საათზე პატრიოტთა ალიანსის ორგანიზებით საპროტესტო აქცია დაიწყება რესპუბლიკის მოედანზე.

პარლამენტში შენობაში უკვე განლაგებულია გაძლიერებული საპოლიციო ძალები. საკანონმდებლო ორგანოში სპეცრაზმმა იარაღიც შეიტანა. საპატრულო პოლიციის უფროსი, ვაჟა სირაძე ამბობს, რომ პარლამენტში ცეცხლსასროლი იარაღი არ არის.