აჭარის ტელევიზიის ყოფილი დირექტორი, სოსო სტურუა, რომელსაც ამ თანამდებობაზე მუშაობის დროს მაშინდელი საინფორმაციო სამსახურის უფროსი, ირინა ყურუა ხელისუფლების ინტერესების გატარებაში ადანაშაულებს, ამავე ტელევიზიის მეურვე გახდა. ის ქართულმა ოცნებამ წარადგინა და დღეს, 25 ოქტომბერს აირჩია კიდეც.

ყურუა ამბობს, რომ სოსო სტურუას დირექტორის თანამდებობაზე მუშაობის დროს ხელისუფლების წარმომადგენლები ხშირად ურეკავდნენ და საინფორმაციო გამოშვებებში გასული მასალების გამო უკმაყოფილებას გამოთქვამდნენ. თავად სტურუა კი მას საყვედურობდა, რომ არ აშუქებდა მთავრობისთვის პოზიტიურ სიახლეებს.

"მძაფრი რეაქცია ჰქონდა ხოლმე, როდესაც ვეუბნებოდი, რომ, ნახე, მონიტორინგში დადებითი შეფასებები გვაქვს. მას ჰქონდა მძაფრი რეაქცია, ახლა ეს არის მნიშვნელოვანი თუ მთავრობის კეთილგანწყობა? ის, რომ მე არ ვცვლიდი გადაწყვეტილებებს, მას საქმეს უფუჭებდა. ჩემი სამსახურიდან გაშვება მისთვის იყო გარანტია, რომ ის დირექტორი გახდებოდა", — ამბობს ყურუა On.ge-სთან საუბრისას.

თავად სტურუა ამ ბრალდებას უარყოფს და პირიქით, ირწმუნება, რომ მისი რეპუტაციიდან გამომდინარე ვერავინ გაბედავდა მისთვის სარედაქციო პოლიტიკასთან დაკავშირებით დარეკა. მისი თქმით, დისკომფორტს იწვევს ის ფაქტი, რომ მეურვეების კანდიდატებს პარტიები ასახელებენ, თუმცა ამის მიუხედავად, კონკურსში მაინც მონაწილეობდა.

"შეიძლება ზოგიერთ ადამიანს მიაჩნდეს, რომ ფრაქციის მიერ არჩეული კანდიდატი საფრთხისშემცველია იყოს პოლიტიკური ხაზის გამტარებელი. ვერ ვხედავ [ამის საფრთხეს], როცა ვხედავ ჩემს სახელსა და გვარს. სადაც ვარ მე, იქ გამორიცხულია", — უთხრა სტურუამ On.ge

სოსო სურუა აჭარის ტელევიზიის დირექტორი ჯერ კიდევ მაშინ გახდა, როცა ის სახელმწიფო არხი იყო და ერთ-ერთი სამინისტროს საქვეუწყებო დაწესებულების სტატუსი ჰქონდა. მოგვიანებით, ის ქართული ოცნების წარდგინებით დაკომპლექტებულმა 5-წევრიანმა სამეთვალყურეო საბჭომ დირექტორად შეარჩია.