ამ დროის წინასწარი მონაცემებით, ჩუღურეთის 14-ე ოლქში გამარჯვებულმა ქართული ოცნების მაჟორიტარობის კანდიდატმა, გია ვოლსკიმ On.ge-სთან საუბარში განაცხადა, რომ ახალი პარლამენტი იმ კანონპროექტზე მსჯელობას გეგმავს, რომელიც კონსტიტუციაში ქორწინების ცნების დაზუსტებას ითვალისწინებს.

გარდა ამისა, ჩვენს შეკითხვას, შეიცვლება თუ არა პრეზიდენტის არჩევის წესი იმ შემთხვევაში, თუ ქართული ოცნება პარლამენტში საკონსტიტუციო უმრავლესობით მოვა, ვოლსკიმ ასე უპასუხა:

"გამოითქვა სხვადასხვა მოსაზრება, რომ თუ ასე იქნა, მაგალითად, ფუნქციებიდან გამომდინარე, საპარლამენტო მმართველობის ხარისხის დონიდან გამომდინარე, რაღა გადაიხედება, რაღაც არ გადაიხედება. ეს ყველაფერი მხოლოდ მსჯელობაა, ასე რომ ჩვენ, ყველა შემთხვევაში, საკონსტიტუციო უმრავლესობით გამარჯვებას უნდა დაველოდოთ, რაც ვფიქრობ რეალურია. აქ მთელი პაკეტია საკითხების გადასახედი, ეს არ არის ცალკე ერთი თემა, ბევრი ასპექტი და მიმართულებაა. ამ თემაზე იყო მსჯელობა, თუმცა ისე არ უნდა გავიგოთ, რომ რაღაც საკითხი გადაწყვეტილია. საზოგადოების ჩართულობის გარეშე არანაირი ცვლილება არ მოხდება".

On.ge-ს შეკითხვას, რას გეგმავს ქართული ოცნება პარლამენტის თბილისში გადმოტანასთან დაკავშირებით, ვოლსკიმ აღნიშნულს მედიის მიერ "სადისკუსიო თემის შემოტანა" უწოდა და განმარტა, რომ ამ საკითხზე მსჯელობა ნაადრევია.