უზენაესი სასამართლოს მოსამართლეობის კანდიდატს, შოთა გეწაძის აზრით, აბორტის გასაკეთებლად მხოლოდ დედის სურვილი საკმარისი არ უნდა იყოს. ამის შესახებ მან პარლამენტის კომიტეტზე გასაუბრების დროს განაცხადა.

მას მიაჩნია, რომ აბორტი დაშვებული უნდა იყოს მხოლოდ მაშინ, თუ არსებობს სამედიცინო ჩვენება, ქალი გააუპატიურეს, ან ინცესტია.

"უბრალო სურვილი დედისა, რომ აღარ მინდა ნაყოფი და მოვიცილო, ეს აღარ უნდა იყოს", — თქვა გეწაძემ.

შოთა გეწაძე ერთ-ერთია იმ მოსამართლეებს შორის, რომელსაც პარლამენტმა უზენაეს სასამართლოში განსამწესებლად კენჭი უნდა უყაროს. მისი გადაწყვეტილებით ჩამოერთვა ბიძინა ივანიშვილს საქართველოს მოქალაქეობა პოლიტიკური აქტივობის დაწყებაზე განაცხადიდან მალევე. გეწაძე იყო იმ კოლეგიაში, რომელმაც არ დააკმაყოფილა დაღესტნელი აქტივისტის, მიკაილ კადიევის თხოვნა საქართველოში ლტოლვილის სტატუსის მიღებაზე.