საპარლამენტო ფრაქცია ქართული ოცნების თავმჯდომარე, მამუკა მდინარაძე ამბობს, რომ პრეზიდენტის მიერ პოლიციელის მკვლელობაში მსჯავრდებულის შეწყალება მიუღებელია. ამის შესახებ მდინარაძემ საზოგადოებრივ მაუწყებელს განუცხადა.

მდინარაძე ამბობს, რომ პრეზიდენტის ადმინისტრაციამ ამ საკითხზე განმარტება უნდა გააკეთოს.

"ერთი მხრივ გასაგებია, რომ მსჯავრდებულის შეწყალება პრეზიდენტის ექსკლუზიური და კონსტიტუციით გარანტირებული უფლებაა, მაგრამ მოცემულ შემთხვევაში, ჩემთვის აბსოლუტურად გაუგებარი და მიუღებელი გადაწყვეტილებაა, მით უმეტეს, დანაშაულის სიმძიმისა და პატიმრობის დარჩენილი ვადის გათვალისწინებით. ვფიქრობ, პრეზიდენტის ადმინისტრაციამ ამ თემაზე განმარტება აუცილებლად უნდა გააკეთოს, რადგან არ მგონია, ჩვენს საზოგადოებაში ბევრი იყოს, ვისაც პოლიციელის მკვლელობაში მსჯავრდებულის შეწყალება მოეწონებოდა", — ამბობს მდინარაძე.

საქართველოს პრეზიდენტმა, სალომე ზურაბიშვილმა შეიწყალა კაცი, რომელმაც ბათუმში პოლიციელი თარაშ მუკბანიანი მოკლა. ჟურნალისტის კითხვაზე, რატომ შეიწყალა, პრეზიდენტმა თქვა, რომ ამას "ნამდვილად არ იტყვის, რატომ".

ამავე თემაზე: