საქართველოს პრეზიდენტის, სალომე ზურაბიშვილის თქმით, ევროპაში მიმდინარე კრიზისი და ბრექსიტი ევროპულ გაერთიანებას და ასევე, საქართველოს ახალ შესაძლებლობებს მისცემს. ამის შესახებ პრეზიდენტმა ევრონიუსთან ინტერვიუში განაცხადა:

"ევროპის პროგრესი ყოველთვის კრიზისის გამო იწყებოდა. არა კრიზისის მიუხედავად, არამედ, კრიზისის გამო და კრიზისის შედეგად... მე ვფიქრობ, ბრექსიტი ძალიან დიდი გამოწვევაა, მაგრამ ის გაუხსნის სხვა შესაძლებლობებს და ახალ ვალდებულებებს ევროპას, რათა რეფორმები გატარდეს. ვინაიდან მე ოპტიმისტი ვარ, დარწმუნებული ვარ იმაშიც, რომ ეს ჩვენც ახალ კარს გაგვიღებს".

ჟურნალისტის კითხვაზე, თუ რატომ სურთ ქართველებს ასე ძალიან ევროკავშირის წევრები გახდნენ, სალომე ზურაბიშვილი პასუხობს, რომ ქართველები ევროპელები არიან:

"ეს არის რაღაც, რაც ძალიან ღრმადაა ჩასმული ქართველების გონებასა და მენტალობაში, რომ ქართველები თავს ევროპელებად გრძნობენ. ეს არის არა ის, რისკენაც უბრალოდ მიისწრაფვიან, არამედ, ისინი არიან ევროპელები. ისინი ასევე ძალიან ოპტიმისტურად არიან განწყობილი ევროპის მიმართ, რადგან არ არსებობს ალტერნატივა".

მსგავსი განცხადება სალომე ზურაბიშვილმა რამდენიმე თვის წინაც გააჟღერა, როდესაც Bloomberg-თან ინტერვიუში თქვა, რომ "საქართველომ უნდა გამოუყენოს ის შანსი, რაც დიდი ბრიტანეთის ევროკავშირიდან გასვლით ეძლევა".

"ჩვენ ამ სიტუაციას ვხედავთ იმ განზრახვით, რომ აქედან მაქსიმალური სარგებელი მივიღოთ... ლოგიკურია, რომ ქვეყანას, რომელიც სტაბილურად წინ მიდის და სურს ევროპა, ვერ მოეპყრობი იმ ქვეყანაზე ნაკლებად, რომელიც დროდადრო მას შორდება", — თქვა პრეზიდენტმა.