რუსთავი 2-ის საინფორმაციო სამსახურის ყოფილი ხელმძღვანელი ნოდარ მელაძე ამბობს, რომ ორი კვირის წინ ის ქართული ოცნების დამფუძნებელთან, ბიძინა ივანიშვილთან დაახლოებული პირის ნდობით აღჭურვილ წარმომადგენელს შეხვდა. მელაძის თქმით, ამ პირმა თანამდებობის სანაცვლოდ დათმობებზე წასვლა შესთავაზა.

როგორც მელაძე ყვება, მას განუმარტეს, რომ რუსთავი 2-ისგან იმედის გაკეთება არ სურთ და კრიტიკულობის რაღაც დოზა დარჩებოდა. ამასთავე, იქნებოდა კონკრეტული ადამიანი, რომელთანაც მას ექნებოდა კომუნიკაცია და გარკვეული თემატიკა მასთან შეთანხმებით უნდა დაეგეგმა. მისივე განმარტებით, ეს ადამიანი არ იქნებოდა არც ლაშა ჩხარტიშვილი და არც კოკა ყანდიაშვილი.

"რუსთავი 2-ის საინფორმაციო სამსახურის უფროსი გეგმავს ყველა გამოშვებას და მიუწვდება ხელი ყველა გამოშვებაზე. მათთვის მარტივი გამოსავალი იქნებოდა, თუ მე დავთანხმდებოდი ამ წინადადებას. დაარქმევდნენ ოფიციალურად, რომ მე ვარ ისევ საინფორმაციო სამსახურის ხელმძღვანელი, არ შეიცვლებოდა სარედაქციო პოლიტიკა, თუმცა, ვციტირებ, ჩამოიწეოდა ტემპერატურა და კრიტიკულობის ხარისხი. მათ, ასევე, მითხრეს, რომ ივანიშვილის ინტერესებში შედიოდა გარკვეული ჩინოვნიკების თანხების მიტაცებასთან და შესაძლო კორუფციასთან დაკავშირებით რეპორტაჟების მომზადება, რადგან ის თავადა ებრძვის ბიუჯეტის ქურდებს, მაგრამ იყო რაღაც თემები, რომელთაც არ უნდა გავკარებოდით. მე ამ წინადადებაზე არ დავთანხმდი", — აღნიშნა ნოდარ მელაძემ.

გარდა ამისა, მელაძე ამბობს, რომ გათავისუფლების შესახებ პაატა სალიამ ბრიფინგამდე რამდენიმე წუთით ადრე უთხრა.

ქიბარ ხალვაშის მიერ რუსთავის 2-ის გადაფორმებიდან ერთი თვის თავზე საინფორმაციო სამსახურის უფროსი, ნოდარ მელაძე სამსახურიდან გაათავისუფლეს. ამის შესახებ არხის გენერალურმა დირექტორმა პაატა სალიამ დღეს, 20 აგვისტოს განაცხადა. მანვე აღნიშნა, რომ არხიდან ათავისუფლებს სხვა თანამშრომლებს გიორგი გაბუნიას, ეკა კვესიტაძეს, გიორგი ლაფერაშვილსა და ნანუკა ჟორჟოლიანს. სალიამ მათი გათავისუფლების მიზეზად "ინტერესთა კონფლიქტი" და "შიდა ომები" დაასახელა.

გაიგეთ მეტი ჟურნალისტების გათავისუფლების მიზეზებზე: