პროკურორ ზვიად გუბელაძის თქმით, ნიკა გვარამიას საქმეს რუსთავი 2-ის გენერალური დირექტორის, პაატა სალიას განცხადებაც დაერთო. ამის შესახებ მან დღეს, 2 აგვისტოს ჟურნალისტებს განუცხადა.

"გამოძიება დაიწყო რუსთავი 2-ს ცხრაპროცენტიანი წილის ყოფილი მფლობელის ინტერესების დამცველის ადვოკატის განცხადების საფუძველზე, ამავე დროს, საქმეს დაერთო მოქმედი გენერალური დირექტორის, პაატა სალიას განცხადება. ამ განცხადებაში საუბარია შესაძლო დანაშაულებრივ ფაქტებზე და ამის საფუძველზე დაიწყო გამოძიება", — თქვა პროკურორმა.

პროკურორს არ დაუკონკრეტებია, საქმეს სალიას საჯარო განცხადება დაურთეს და თავად სალიამ მიმართა განცხადებით. რუსთავი 2-ის გენერალურ დირექტორად დანიშვნის შემდეგ სალიამ თქვა, რომ ტელეკომპანიაში ფინანსური პრობლემები დახვდა.

ნიკა გვარამიამ აღნიშნა, რომ მისთვის უცნობი იყო, საქმეში სალიას განცხადების შესახებ. გვარამიას გამოკითხვა თბილისის საქალაქო სასამართლოში ამ წუთებში მიმდინარეობს. ამ საქმეზე პროკურატურამ განცხადება გუშინ, პირველ აგვისტოს გაავრცელა.

"რუსთავი 2-ის კანონიერი ინტერესის საწინააღმდეგოდ უფლებამოსილების ბოროტად გამოყენების, მისი კუთვნილი დიდი ოდენობით თანხების სამსახურებრივი მდგომარეობის გამოყენებით მითვისების და ქონების მოჩვენებითი ან/და თვალთმაქცური გარიგებით გადამალვის საქმეზე მიმდინარე გამოძიების ფარგლებში, პროკურატურის შუამდგომლობის საფუძველზე მიღებულია სასამართლოს შესაბამისი განჩინებები რუსთავის 2-ის კონტრაქტორი საწარმოებიდან, მათ შორის ინტერ მედია და ინტერ მედია პლიუსიდან, გამოძიებისათვის საჭირო დოკუმენტაციისა და ელექტრონული ინფორმაციის ამოღების თაობაზე", — ნათქვამია პროკურატურის განცხადებაში.