ბათუმში სამი წლის ბავშვი ლიფტის შახტში ჩავარდა. ბათუმის სასწრაფოში On.ge-ს უთხრეს, რომ მათთან მომხდარზე შეტყობინება შევიდა, თუმცა ადგილზე მისულებს ადგილზე არავინ დახვდათ. ბავშვი საავადმყოფოში მშობლებმა გადაიყვანეს.

აჭარის ტელევიზიის ინფორმაციით, ბავშვს მრავლობითი დაჟეჟილობა აღენიშნება. ექიმის თქმით, ბავშვს ხილული მოტეხილობა არ აქვს და მიმდინარეობს მონიტორინგი. თვითმხილველები ყვებიან, რომ ლიფტის კარი გაფუჭებულია და ადვილად იღება. მათივე თქმით, ბავშვი პირველ სართულზე იყო, როცა კარი გაიღო, ფეხი დაუცდა და ჩავარდა.

შინაგან საქმეთა სამინისტრომ გამოძიება სისხლის სამართლის კოდექსის 240-ე მუხლის პირველი ნაწილით დაიწყო, რაც გულისხმობს უსაფრთხოების წესის დარღვევას სამთო, სამშენებლო ან სხვა სამუშაოს წარმოებისას, რამაც გამოიწვია ჯანმრთელობის ნაკლებად მძიმე ან მძიმე დაზიანება. ისჯება ჯარიმით ან გამასწორებელი სამუშაოთი ვადით ორ წლამდე ანდა თავისუფლების აღკვეთით ვადით ორ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე ან უამისოდ.