ტელეკომპანია რუსთავი 2-ის ყოფილი მფლობელები ძმები, ლევან და გიორგი ყარამანიშვილები და ნიკოლოზ ნაყოფია არხის თანამშრომლებსა და დირექტორს მადლობას უხდიან და აღნიშნავენ, რომ დანებებას არ აპირებენ. მათი განცხადება რუსთავი 2-მა გაავრცელა.

"ეს არ არის დამშვიდობების მადლობა, მეგობრებო. ეს არის მადლობა აქამდე გადახდილი ბრძოლებისთვის, რადგან ბრძოლა გრძელდება და გრძელდება გამარჯვებამდე... ამ ბრძოლაში ჩვენ დანებების, უიმედობის ან უკან დახევის უფლება არ გვაქვს. ერთად ჩვენ აუცილებლად გავიმარჯვებთ", — ვკითხულობთ განცხადებაში.

ამავე განცხადებით, ყოფილი მფლობელები ყველა პოტენციურ მყიდველს მოუწოდებენ თავი შეიკავონ არხის შეძენისგან, რადგან ისინი არაკეთილსინდისიერ მყიდველებად იქნებიან მიჩნეული.

ადამიანის უფლებათა ევროპულმა სასამართლომ რუსთავი 2-ის საქმეზე ევროპული კონვენციის არცერთი მუხლის დარღვევა არ დაადგინა. გადაწყვეტილება 18 ივლისს გახდა ცნობილი. ეს ნიშნავს, რომ ძალაში რჩება საქართველოს უზენაესი სასამართლოს გადაწყვეტილება, რომლის მიხედვითაც არხი ძმები ყარამანიშვილებისა და ნაყოფიას ნაცვლად ქიბარ ხალვაშს ეკუთვნის.