თავდაცვის ყოფილი მინისტრის, ირაკლი ოქრუაშვილის მტკიცებით, 2016 წლის სროლის უკან ქართული ოცნების მაღალჩინოსნები დგანან. როგორც მან გადაცემა რეაქციაში ისაუბრა, სროლა სწორედ იმ დოკუმენტს უკავშირდება, რომლის საფუძველზეც ის რუსთავი 2-ის წილებზე პრეტენზიას აცხადებს.

"2016 წელს, როდესაც მომთხოვეს ამ დოკუმენტის მიხედვით უარი მეთქვა პრეტენზიებზე, თქვენ გგონიათ ვიღაც ხამსამ მესროლა? [ირაკლი] ღარიბაშვილს შევუთვალე, შენ იდექი ამის უკან მეთქი და 15 წუთში დაფქვა მე არ ვიყავი კახა კალაძე იყოო. ამ დოკუმენტის მიცემაზე რომ უარი ვუთხარი, ამის მერე მესროლეს. მათ მშვენივრად იცოდნენ რომ ეს [დოკუმენტი] არის ნამდვილი. გგონიათ, ეს დოკუემნტი რვა თვე სამხარაულში რომ დევს ექსპერტიზაზე, ივანიშვილს გარკვეული არ აქვს ნამდვილია თუ არა?" — განაცხადა ოქრუაშვილმა.

ირაკლი ოქრუაშვილს 2016 წელს გორში ცეცხლსასროლი იარაღიდან ესროლეს. მაშინ ოქრუაშვილი გორის მაჟორიტარი დეპუტატობის კანდიდატი იყო. თავდასხმის შედეგად პოლიტიკოსის ორი თანმხლები პირი დაიჭრა, მათ შორის დაცვის წევრი. პოლიტიკოსმა სროლაში მმართველი პარტია ქართული ოცნება დაადანაშაულა.

ამ წელს ირაკლი ღარიბაშვილი პრემიერ-მინისტრობის თანამდებობიდან გადამდგარი იყო და საჯარო პოლიტიკით დაკავებული არ იყო. კახა კალაძე კი ენერგეტიკის მინისტრის პოსტს იკავებდა.

გამოძიების დაწყებიდან ორ დღეში მკვლელობის მცდელობაში ბრალდებული პირი დააკავეს. მას 2017 წელს 17-წლიანი პატიმრობა მიესაჯა. ამავე პირს ბრალი კიდევ ორი პირის მკვლელობისთვის ედება.