დიდი ბრიტანეთის შემდეგი პრემიერ-მინისტრი ლონდონის ყოფილი მერი და საგარეო საქმეთა ყოფილი მინისტრი, ბორის ჯონსონი გახდება. ის ამ თანამდებობაზე ტერეზა მეის შეცვლის.

ქვეყნის მასშტაბით თითქმის ორკვირიანი კენჭისყრების შემდეგ კონსერვატიული პარტიის ათეულობით ათასმა წევრმა პარტიის ლიდერად სწორედ ჯონსონი აირჩია, შესაბამისად პრემიერის თანამდებობას ის დაიკავებს.

ჯონსონის მთავარი კონკურენტი საგარეო საქმეთა მოქმედი მინისტრი ჯერემი ჰანტი იყო, თუმცა გამოკვეთილ ფავორიტად მაინც ჯონსონი მიიჩნეოდა. ბორის ჯონსონმა კონსერვატიული პარტიის წევრების 92 153 ხმა მიიღო, ხოლო ჯერემი ჰანტმა — 46 656.

ჯონსონს გამარჯვება უკვე მიულოცა პრემიერ-მინისტრმა ტერეზა მეიმ და ბრექსიტის საკითხზე სრული მხარდაჭერა გამოთქვა.

თავის მხრივ ბორის ჯონსონმა პატივისცემა გამოხატა ჰანტის მიმართ და თქვა, რომ ის "შესანიშნავი იდეების წყაროა", რომელთა "მოპარვასაც აპირებს". გარდა ამისა, მან პატივისცემა გამოხატა ტერეზა მეის მიმართ, რომელიც პრემიერის თანამდებობას ტოვებს.