პენტაგონის განცხადებით, ამერიკის შეერთებული შტატები საუდის არაბეთში სამხედრო კონტინგენტს განათავსებს, რათა დაიცვას ამერიკის ინტერესები "მოსალოდნელი სარწმუნო საფრთხისგან". აშშ-ს სამხედრო კონტინგენტმა რეგიონში სტაბილურობის და უსაფრთხოების შენარჩუნებისთვის უნდა იზრუნოს.

აღნიშნული გადაწყვეტილება სპარსეთის ყურის რეგიონში ვითარების გამწვავების ფონზე მიიღეს. სამეფოში აშშ-ს სამხედრო ძალები 1991-2003 წელს სპარსეთის ყურის ომის დროს იმყოფებოდნენ.

BBC-ის კორესპონდენტის ცნობით, საუბარია 500 ამერიკელ სამხედრო მოსამსახურეზე, რომლებიც ერ-რიადის აღმოსავლეთში არსებულ ბაზაზე განლაგდებიან.

ირანსა და აშშ-ის შორის ურთიერთობები განსაკუთრებით მას შემდეგ გამწვავდა, რაც აშშ ირანული ატომის მრავალწლიანი პრობლემის დარეგულირების მიმართულებით მიღწეული შეთანხმებიდან გავიდა.

2015 წლის ხელშეკრულებით, ირანმა პირობა დადო, რომ ეკონომიკური სანქციების სანაცვლოდ, შეამცირებდა ურანით გამდიდრების პროცესს. ირანთან ხელშეკრულებას ხელი ექვსმა სახელმწიფომ მოაწერა: ამერიკის შეერთებულმა შტატებმა, ბრიტანეთმა, ჩინეთმა, საფრანგეთმა, გერმანიამ და რუსეთმა.

გასულ წელს ტრამპმა ამერიკა ხელშეკრულებიდან ერთპიროვნულად გაიყვანა და ვაშინგტონმა ირანს სანქციები ისევ განუახლა. დანარჩენი ქვეყნები ამერიკის ახალ პოზიციას არ იზიარებდნენ და შეთანხმებაში დარჩნენ.

პასუხად ირანმა განაცხადა, რომ ხელშეკრულებით გათვალისწინებულ რამდენიმე პუნქტს ტოვებს და ურანით გამდიდრების ლიმიტებს ზრდის. თეირანი იმუქრება, რომ 2015 წლამდე არსებულ, ურანით გამდიდრების დონეს დაუბრუნდება, თუ ევროპის ქვეყნები სანქციებით დაზარალებულ ქვეყნის ეკონომიკას უფრო ეფექტურად არ დაეხმარებიან. ქვეყნის პრეზიდენტი ჰასან როუჰანი იმუქრებოდა, რომ ჩაკეტავდა ჰორმუზის სრუტეს, რომლის გავლითაც ხვდება ნავთობი საერთაშორისო ბაზარზე. ჰორმუზის სრუტით სპარსეთის ყურე ომანის ყურეს უკავშირდება, შემდეგ — არაბეთის ზღვას და ბოლოს — ინდოეთის ოკეანეს. ბაჰრეინს, ყატარსა და ქუვეითს ნავთობის ექსპორტი მხოლოდ ამ სრუტის გავლით შეუძლიათ, რადგანაც ზღვაზე სხვა გასასვლელი არ აქვთ. აქ გადის საუდის არაბეთის, არაბთა გაერთიანებული საამიროებისა და ერაყის ტანკერებიც.

დონალდ ტრამპმა ასევე განაცხადა, ამერიკულმა მხარემ ის ირანული დრონი გაანადგურა, რომელიც ჰორმუზის სრუტეში გემსა და მის ეკიპაჟს საფრთხეს უქმნიდა. მისი თქმით, ის 900 მეტრზე მიუახლოვდა გემს და მიუხედავად ბევრი მოწოდებისა, უკან დაეხია, ასე არ მოხდა. ირანი აცხადებს, რომ მას არც ერთი დრონი არ დაუკარგავს.