საქართველოს პერეზიდენტის ადმინისტაციაში ამბობენ, რომ გერმანიაში, ქალაქ მიუნხენში, სტუდენტებთან შეხვედრაზე სალომე ზურაბიშვილი გაღიზიანებული არ ყოფილა. პრესსპიკერის თქმით, ინფორმაცია, რომ პრეზიდენტი იყო აგრესიული და ირონიული ტყუილია.

"ქართველი სტუდენტების და საქართველოს პრეზიდენტის შეხვედრის დროს ზოგიერთი მედიასაშუალებით გავრცელებული ინფორმაცია, იყო აბსოლუტური ტყუილი. შეხვედრაზე არ თქმულა არცერთი სიტყვა, რომელიც გავრცელდა, პრეზიდენტი არ ყოფილა გაღიზიანებული, პასუხი გაეცა ყველა კითხვას, მათ შორის დავით გარეჯთან დაკავშირებით. არანაირი ირონიული ტონი, არანაირი გაღიზიანება, ხაზის ვუსვამ, არსად არ ისმის ის სიტყვა, რომელზეც საუბრობენ რესპონდენტები, ასეთი სიტყვა არ ყოფილა იქ", — განაცხადა პრეზიდენტის პრესსპიკერმა ხატია მოისწრაფიშვილმა.

გუშინ, 15 ივლისს, გერმანიაში, ქალაქ მიუნხენში მიმდინარე შეხვედრაზე თეოლოგმა მირიან გამრეკელაშვილმა შეხვედრის მონაწილე გიორგი ხიმშიაშვილთან ერთად 20 ივნისის აქციის დაშლა სიმბოლურად გააპროტესტა. მათ მარჯვენა თვალზე ხელი აიფარეს. მოგვიანებით გიორგი ხიმშიაშვილმა აღნიშნა, რომ სანამ კითხვები სპორტსა და განათლებას ეხებოდა, ყველაფერი მშვიდად მიდიოდა, თუმცა შემდეგ ვითარება დაიძაბა. სტუდენტმა რუსთავი 2-თან საუბრისას აღნიშნა, რომ პრეზიდენტს მათ მიერ დასმული კრიტიკული შეკითხვები არ მოეწონა, აგრესიული გახდა და შეურაცხყოფა დაიწყო.