შინაგან საქმეთა მინისტრი, გიორგი გახარია პარლამენტთან განვითარებულ მოვლენებთან დაკავშირებით ამბობს, რომ სანამ ადამიანების სიცოცხლეს არ დაემუქრა საფრთხე, პოლიციელები საერთოდ არ განძრეულან. ამის შესახებ მან შსს-ში განაცხადა.

მისივე თქმით, სიტუაცია იმ დონემდე დაიძახა, რომ "მიუხედავად იმისა, რომ პოლიციამ მაქსიმალურად გამოიყენა თმენის ვალდებულება, იძულებული გახდა, გამოეყენებინა სპეციალური საშუალებები".

მინისტრის განცხადებით, დეტალურად შეისწავლიან ყველაფერს და ყველა ის ადამიანი, რომელიც მოუწოდებდა და მოახერხა, ორგანიზება გაეწია მშვიდობიანი აქციის ძალადობრივ აქციად გარდაქმნას, უმკაცრესად დაისჯება.

კითხვაზე, ნახა თუ არა კადრები, როგორ ესვრის დამიზნებით სამართალდამცველი ოპერატორს, გახარიამ უპასუხა: "არ მაინტერესებს თქვენი კადრი".

"გუშინ პოლიტიკოსებმა შეძლეს და ჩვენი მოქალაქეების სამართლიანი პროტესტი გადაზარდეს ძალადობაში. ძალადობაში, რომელიც იყო მიმართული პოლიციელებისა და ინსტიტუტების წინააღმდეგ. ძალადობაში, რომელმაც საბოლოოდ მიიღო პარლამენტის შტურმის სახე. ეს არის უმძიმესი რამ, რაც ამ ქვეყანაში ათწლეულებია არ მომხდარა", — თქვა გახარიამ.

ქართული ოცნების წევრის, ზაქარია ქუცნაშვილის ორგანიზებით გამართული ასამბლეის ფარგლებში რუსმა დეპუტატმა, სერგეი გავრილოვმა საქართველოს პარლამენტის შენობაში პარლამენტის თავმჯდომარის ადგილი დაიკავა. ეს ფაქტი გააპროტესტა ვიცე-სპიკერმა თამარ ჩუგოშვილმა და პრეზიდენტმა სალომე ზურაბიშვილმა. თავდაპირველად, უმრავლესობის წევრმა, ზაქარია ქუცნაშვილმა თქვა, რომ "სადღაც რუსს რომ დავინახავთ, არ უნდა გავნადგურდეთ", მოგვიანებით კი განმარტა, რომ "თუ საჭიროა, პოლიტიკურ პასუხისმგებლობას აიღებს". პროტესტის შემდეგ კონფერენცია შეწყდა.

პარლამენტის თავმჯდომარის, პრემიერისა და შინაგან საქმეთა მინისტრის გადადგომის მოთხოვნით გუშინ, 20 ივნისს, 19 საათზე პარლამენტის შენობასთან აქცია გაიმართა, რომელიც ბოლოს წყლის ჭავლის, ცრემლსადენი გაზითა და რეზინის ტყვიებით დაშალეს.