"როგორც კი საჭირო იქნება, მაშინვე გადავდგები", — ასე უპასუხა ჟურნალისტების კითხვას შს მინისტრმა გიორგი გახარიამ, იმის შესახებ აიღებს, თუ არა პასუხისმგებლობას საკუთარ თავზე.

გიორგი გახარიამ მოუწოდა აქციის მონაწილეებს პატივი სცენ პოლიციელებს და მისცენ მას საშუალება შეასრულონ თავისი ფუნქცია.

"პირველ რიგში, უნდა აღვნიშნოთ ის, რომ, რაც ხდება არის არა სამწუხარო, არამედ ტრაგედია. შეიძლება მიზეზი იყოს ბევრი, ზოგჯერ სამართლიანი, თუმცა სახელმწიფო ინსტიტუტებზე შეტევა, მოწოდება ასეთი შეტევის, როგორც არ უნდა დამთავრდეს ეს ტრაგიკული შეტევა და თავდასხმა პოზიციაზე, რომელიც არის სახელმწიფო ინსტიტუტი და თავდასხმა პარლამენტზე, ამას ექნება შეფასება და ყველა დაისჯება კანონის სრული სიმკაცრით", — განაცხადა პარლამენტში მყოფმა შს მინისტრმა.

კითხვაზე, იღებთ თუ არა პასუხისმგებლობას იმაზე, რომ რუსი დეპუტატი სერგეი გავრილოვი საქართველოში შემოვიდა, გიორგი გახარია პასუხობს, რომ არ იცის რომელი დეპუტატის გვარს გულისხმობს.

შს მინისტრის თქმით, ასამბლეის სიიდან ორი გვარი ამოიღო, რადგან ისინი ოკუპაციის შესახებ კანონს არღვევდნენ.

"არ აქვს მნიშვნელობა, ვინ გადაგდება და ვინ დარჩება, ახლა სახელმწიფო ინსტიტუტებზე შტურმი მიმდინარეობს, რაც დაუშვებელია", — განაცხადა შს მინისტრმა. ამის შემდეგ ჟურნალისტი დაინტერესდა, გადაგდება თუ არა გახარია, თუ მას პასუხისმგებლობა დაეკისრება. "როგორც კი საჭირო იქნება, მაშინვე გადავდგები", — უპასუხა გახარიამ.

შს მინისტრი საქართველოს პარლამენტთან მივიდა, სადაც ამ დროისთვის ვითარება დაძაბულია. აქციის მონაწილეები პარლამენტში შეჭრას ცდილობენ. მობილიზებულია პოლიცია და სპეციალური დანიშნულების რაზმი.