სახალხო დამცველის აპარატის ინფორმაციით, ნინო ლომჯარიას ინტერნეტსივრცეში სიცოცხლის მოსპობით ემუქრებიან. მათი ცნობით, მუქარა ლომჯარიას განცხადებების მოჰყვა, სადაც ომბუდსმენი შეკრებისა და მანიფესტაციის დაცვის მოწოდებით გამოვიდა.

"ქვეყანაში 18-23 ივნისს ლგბტ+ თემის მიერ დაგეგმილ ღირსების მარშს სახალხო დამცველი სპეციალური განცხადებით გამოეხმაურა და ქვეყანაში არსებული მაღალი ჰომოფობიური განწყობებიდან გამომდინარე მოუწოდა სამართალდამცველებს, აქციის ორგანიზატორებისთვის მიეცათ კონსტიტუციით გარანტირებული უფლების რეალიზების საშუალება და დაეცვათ მათი უსაფრთხოება", — აღნიშნავენ აპარატში.

მათივე თქმით, მუქარის პარალელურად 14 ივნისის აქციაზე რადიკალურად განწყობილმა კონტრაქციონერებმა სახალხო დამცველის მოადგილეების — გიორგი ბურჯანაძისა და ეკატერინე სხილაძის მიმართ საქმიანობის ხელშეშლა სცადეს, რაც ფიზიკური დაზიანების მუქარასა და სიტყვიერ შეურაცხყოფაში გამოიხატა.

ომბუდსმენი მუქარის შეტყობინებებზე გამოძიების დაწყებას მიესალმება და შსს-ს მოუწოდებს, 14 ივნისს, ომბუდსმენის მოადგილეების მიმართ მუქარაზეც დაიწყოს გამოძიება.