პრემიერ-მინისტრმა მამუკა ბახტაძემ ავსტრიის ელჩის განცხადებაზე, საქართველოში ბიზნესის წარმოების პრობლემაზე თქვა, რომ პრობლემები არსებობს. პრემიერის განმარტებით, სწორედ ამ მიზნით განხორციელდა საკადრო ცვლილებები მთავრობაში.

"რაც შეეხება გადაწყვეტილების სისწრაფეს, მე ამის შესახებ საქართველოს პარლამენტშიც მქონდა საუბარი. ის, რომ ბევრ მიმართულებაში ჩვენ გვაქვს დასახვეწი საკითხი... ის პრობლემები, რაც არსებობდა დღეს, რეალურად არის დაძლეული. პროცედურების ნაწილი გვაქვს გასამარტივებელი და აქ მე ვფიქრობ, რომ ჩვენ უნდა დავეყრდნოთ ძირითადად საერთაშორისო ორგანიზაციებს და საერთაშორისო ინსტიტუტების შეფასებებს და იცით, საქართველო ბიზნესის კეთების თვალსაზრისით არის მსოფლიოში მეექვსე ადგილზე. ეს რა თქმა უნდა, არ არის იმის საფუძველი, რომ ვთქვათ, ყველაფერი კარგად არის. ყველაფერი კარგად არ არის. ძალიან ბევრი რამე გვაქვს გასაუმჯობესებელი, მაგრამ შედეგი სახეზეა", — განაცხადა მამუკა ბახტაძემ.

ავსტრიის ელჩმა არად ბენკომ BMG-სთან ინტერვიუში საქართველოში გადაწყვეტილების მიმღებთა ნაკლებობაზე ისაუბრა.

"მე ვფიქრობ, საქართველოში თაობათა ჭიდილია. ჩვენ მუდმივად გვიწევს საქართველოში იმ პრობლემასთან შეჭიდება, რაც გადაწყვეტილების მიუღებლობაა... სწორედ ეს წარმოადგენს დამაბრკოლებელ ფაქტორს საქართველოში ბიზნესის კეთებაზე როცა მიდგება საქმე", — თქვა ელჩმა BMG-ის თარგმანის მიხედვით და გამოყო, რომ ცალკე პრობლემაა სახელმწიფო შესყიდვები, სადაც ისინი ხშირად აწყდებიან გამჭვირვალობის არარსებობას.