30 სექტემბერს საქართველოში რომის პაპი ფრანცისკე ჩამოდის. პაპის ვიზიტს ეწინააღმდეგება მართლმადიდებელი მშობელთა კავშირი.

დისკრიმინაციული და ჰომოფობიური განცხადებით გამოდის ბათუმის წმ. ბარბარეს სახელობის ტაძრის წინამძღვარი, დეკანოზი შიო პაიჭაძეც. ის პაპს ცრუს, ჰალუცინირებულს უწოდებს, მის განცხადებებს სკანდალურს, პაპიზმს კი მწვალებლობად აფასებს:

"საქართველოში საქადაგებლად ჩამოდის ცრუ პაპი, რომელიც ამბობს, რომ ჰომოსექსუალებს ბოდიში უნდა მოვუხადოთო, ასევე ამბობს, რომ არც ადამი არსებობდა და არც ევა, არც ჯოჯოხეთი არსებობს და არც სამოთხეო, უცხოპლანეტელებთან მოსაუბრე ჰალუცინირებულმა პაპმა, რომელიც უცხოპლანეტელების მონათვლასაც კი აპირებს, ჩვენ უნდა გვიქადაგოს ქრისტიანობა? ეხლა დრო უნდა გამოვიყენოთ, რომ გავიაზროთ - მასთან თანაზიარება საშიში და დამღუპველი იქნება.

ის გამოირჩევა სკანდალური განცხადებებით. ასევე მან განაცხადა, რომ ბოდიში უნდა მოუხადოთ ჰომოსექსუალებს...მკითხველმა განსაჯოს.

წმინდა იოანე ოქროპირი ბრძანებს: ჯოჯოხეთი, რომ არ არსებულიყო ალბათ მას მამათმავლობა ჩაანაცვლებდაო.

არ მივიდეთ პაპის მესაზე, რომელიც პროზელიტურ ხასიათს ატარებს. მინდა გავაფრთხილო მკითხველი და ვურჩიო, რომ იქადაგონ ამის შესახებ, რომ პაპიზმი მწვალებლობაა. მოდას აყოლილი "ევროპფილები" სიხარულით გაეშურებიან პაპის მესაზე, მაგრამ მათაც მამობრივად შევახსენებ, რომ არ მივიდნენ. ხოლო ჰომოსექსუალებისთვის ჩატარებულ მესას ალბათ ისინი დაესწრებიან, რომელთაც უყვარს სოდომია და გარყვნილება. მაპატიეთ ასეთი მკაცრი განცხადებისთვის, მაგრამ პაპიზმი კაცობრიობის დაუძინებელი მტერია".

მართლმადიდებელი დეკანოზის შიო პაიჭაძის განცხადებას საეკლესიო გამომცემლობა კარიბჭე ავრცელებს.

შარშან შიო პაიჭაძემ მშობლები.ჯი-სთან ინტერვიუში განაცხადა, რომ ჰელოუინი სატანის დიდების დღესასწაულია და მას საქართველოში მიმბაძველობის გამო აღნიშნავენ.