ქართული ოცნებიდან წასული დეპუტატები, გედევან ფოფხაძე და ეკა ბესელია ახალი პოლიტიკური პარტიას შექმნიან. გედევან ფოფხაძემ On.ge-სთან საუბარში აღნიშნა, რომ მიმდინარეობს ტექნიკური საკითხების განხილვა, ახალი სახეებისა და მხარდამჭერების მოძიება. რუსთავი 2-თან საუბარში ეკა ბესელიამ თქვა, რომ მისი მიზანია, სამართლიანობისთვის ბრძოლა:

"პოლიტიკური პარტია აუცილებელი ინსტრუმენტია იმისთვის, რომ ქვეყანაში არჩევნების გზით მოხდეს ცვლილებები. ეს არის რეალისტური... საკმაოდ ბევრი ადამიანი აღმოჩნდა, ვინც არასოდეს ყოფილა პოლიტიკაში, მაგრამ თავის პროფესიაში არის წარმატებული და საინტერესო, ასეთი პროფესიული წარმომადგენლობა მე მგონი იქნება ძალიან საინტერესო ერთობის საფუძველი".

ეკა ბესელიას თქმით, საზოგადოებრივი მოძრაობა დაიცავი საქართველო მის მხარდამჭერ მოძრაობად დარჩება და არ გადაკეთდება პარტიად.

"არავითარი მესამე ძალა, ეს იქნება ალტერნატიული ძალა, რომელიც შეცვლის ხელისუფლებას", — ამბობს ეკა ბესელია.

მმართველი პარტიის ყოფილი წევრების ახალი პოლიტიკური ძალის ჩამოყალიბებაზე ინფორმაცია IPN-მა გაავრცელა.

დღეს, 23 მაისს ცნობილი გახდა, რომ ქართული ოცნებიდან გარიცხული დეპუტატი, დავით ჭიჭინაძე მემარცხენე-კონსერვატიულ პოლიტიკურ მოძრაობას ქმნის. On.ge-სთან საუბარში მან თქვა, რომ წარდგენა 22 ივნისს, თბილისში გაიმართება.