4 ივნისიდან ქუთაისის აეროპორტში უკრაინული დაბალბიუჯეტიანი ავიაკომპანია SkyUp Airlines დაიწყებს ოპერირებას. აეროპორტების გაერთანების განცხადებით, კომპანია კვირაში ორჯერ შეასრულებს რეისებს ოდესისა და ხარკოვის მიმართულებით.

უწყების ინფორმაციით, SkyUp Airlines-მა ოდესადან და ხარკოვიდან რეისებზე, ბილეთის ფასში შეიყვანა ბათუმის მიმართულებით ტრანსფერი. მათი განმარტებით, იმისათვის, რომ ამ ავიაკომპანისს მგზავრი ქუთაისის აეროპორტიდან ბათუმში მოხვდეს, ბილეთის ყიდვისას შესაბამის ოფცია უნდა მონიშნოს. მათივე თქმით, სერვისის უფასოდ მიღება მხოლოდ SkyUp Airlines-ის საიტზე ბილეთის ყიდვისასაა შესაძლებელი.

უკრაინული დაბალბიუჯეტიანი ავიაკომპანია SkyUp 2016 წელს დაფუძნდა და ფრენების განხორციელება 2018 წლის მაისიდან ევროპის, აფრიკისა და ახლო აღმოსავლეთის მიმართულებით დაიწყო. საქართველოს ბაზარზე ავიაკომპანიამ ოპერირება 2018 წლის ზაფხულში, ჩარტერული რეისებით, ბათუმის საერთაშორისო აეროპორტიდან დაიწყო, მოგვიანებით კი რეგულარული რეისების განხორციელება თბილისის საერთაშორისო აეროპორტიდანაც დაამატა.