ოკუპირებული აფხაზეთში ოპოზიცია ითხოვს, რომ დე ფაქტო საპრეზიდენტო არჩევნები ივლისის ნაცვლად შემოდგომაზე ჩატარდეს. ამის მიზეზი კი ერთ-ერთი კანდიდატის, ასლან ბჟანიას ჯანმრთელობის მდგომარეობის მოულოდნელი გაუარესებაა. ოპოზიციის წარმომადგენლები და ბჟანიას ოჯახის წევრები ამბობენ, რომ პოლიტიკოსი სავარაუდოდ მოწამლეს.

სოხუმის ცენტრში აქციები გუშინ, 20 მაისს პარლამენტის შენობასთან დაიწყო მას შემდეგ, რაც დე ფაქტო პარლამენტმა დე ფაქტო არჩევნების გადატანაზე უარი განაცხადა. ოპოზიციის წევრებმა უწყვეტი აქციები და დაუმორჩილებლობა გამოაცხადეს.

აქციის წევრებმა დღეს, 21 მაისს ორი საავტომობილო მაგისტრალი გადაკეტეს. დე ფაქტო შინაგან საქმეთა მინისტრმა, გარი არშბამ განაცხადა, რომ მათ წინააღმდეგ, ვინც გზა გადაკეტა შესაბამის ზომებს მიიღებენ.

ოკუპირებულ აფხაზეთში დე ფაქტო პრეზიდენტის არჩევნები 21 ივლისს გაიმართება. ამჟამინდელ დე ფაქტო ლიდერს, რაულ ხაჯიმბას უფლებამოსილება 2019 წლის 25 სექტემბერს უწყდება. რაულ ხაჯიმბა დე ფაქტო პრეზიდენტად პირველად 2014 წელს აირჩიეს, შესაბამისად მას შეუძლია კენჭი მეორედაც იყაროს.

როგორც დე ფაქტო აფხაზეთის რესპუბლიკის კონსტიტუციაშია აღნიშნული, პრეზიდენტი უნდა იყოს აფხაზური ეროვნების, 35-წლიდან 65 წლამდე პირი. ერთსა და იმავე პირს პრეზიდენტობა ზედიზედ მხოლოდ ორჯერ შეუძლია.