მოძრაობა დავითიანნის ხელმძღვანელის, კოტე სვანიძის ინფორმაციით, "ოჯახის სიწმინდის დღისთვის" მიძღვნილ კონცერტზე სოლო მომღერლები არ გამოვლენ და მასში მონაწილეობას, ძირითადად, ანსამბლები მიიღებენ.

სვანიძეს On.ge-ს უთხრა, რომ კონცერტში მონაწილეობას მიიღებენ სუხიშვილები, ერისიონი, რუსთავი და ალილო. მისივე ცნობით, კონცერტი დღეს, 17 მაისს სამების ეზოში, 20:00 საათზე დაიწყება.

17 მაისი ჰომოფობიასთან და ტრანსფობიასთან ბრძოლის საერთაშორისო დღეა. 2013 წლის 17 მაისს ძალადობრივმა ჯგუფებმა, მათ შორის ანაფორით შემოსილმა პირებმა მშვიდობიანი აქცია დაარბიეს. ამის შემდეგ საქართველოს მართლმადიდებელი ეკლესიის პატრიარქმა, ილია მეორემ 2014 წელს ეს დღე "ოჯახის სიწმინდის დღედ" გამოაცხადა.

წელს ამ დღის აღსანიშნავად რამდენიმე ღონისძიება იგეგმება, მათ შორისაა სამების საკათედრო ტაძრის გალავანთან გალა კონცერტი. თავდაპირველად ბროშურაზე "ჩვენი ოჯახი ჩვენი ღირსებაა" ეწერა, რომ 17 მაისს დაგეგმილ კონცერტზე იმღერებენ ნინო ქათამაძე, თამრიკო ჭოხონელიძე, ნატო მეტონიძე, აჩიკო ნიჟარაძე და სხვა შემსრულებლები. ასევე, იცეკვებს ნაციონალური ბალეტი სუხიშვილები.

მოგვიანებით გაირკვა, რომ თბილისში დაგეგმილ კონცერტზე არ იმღერებენ ნინო ქათამაძე, ნატო მეტონიძე, აჩიკო ნიჟარაძე და ანსამბლი შვიდკაცა. რაც შეეხება ნაციონალურ ბალეტ სუხიშვილებს, მათი ინფორმაციით, კონცერტზე სტუდიის კურსდამთავრებული ბავშვები იცეკვებენ. 13 მაისს ცნობილი გახდა, რომ გორში იმავე შინაარსის კონცერტი გაიმართება, რომელშიც აჩიკო ნიჟარაძე მიიღებს მონაწილეობას.

პირველ მაისს კონცერტის ორგანიზატორმა, მოძრაობა დავითიანნმა ღონისძიებასთან დაკავშირებით არასწორი ინფორმაციის გავრცელების გამო ბოდიში მოიხადა. მოძრაობა განცხადებაში აღნიშნავს, რომ კონცერტის მონაწილეთა შორის დასახელდნენ ის პიროვნებები, რომლებთანაც შეთანხმება ბოლომდე არ ჰქონდათ დასრულებული.