დღეს, კახეთში ჩატარებულ გადაცემაში, შეხვედრები რეგიონულ მედიასთან, ბიძინა ივანიშვილმა განაცხადა, რომ მას შემდეგ, რაც პრემიერი გახდა, მინისტრები კონტროლდებიან, რომ არ იყოს კორუფცია და ამ სტანდარტს გიორგი კვირიკაშვილი დღეს მასზე უფრო მკაცრად მიჰყვება:

"ჩემი პრემიერობისას ჩემი ფავორიტი მინისტრი იყო სოფლის მეურნეობის მინისტრი [დავით] კერვალიძე, თუმცა როცა გაჩნდა იქ კითხვის ნიშანი, რომ შესაძლოა იქ კორუფცია ყოფილიყო და ტექნიკა იმაზე ძვირად შეეძინათ და გადაეხარჯათ ბიუჯეტის თანხები, ის კულტურულად მოიქცა, გადადგა და დაელოდა პროკურატურას.

ამ დამოკიდებულებას დაექვემდებარა მთავრობის სხვა წევრები. გაჩნდა კითხვები ღარიბაშვილზე რომ იყო იქ ნათესავი? რეაქცია გაკეთდა. კვირიკაშვილის დამოკიდებულება დღეს არის უფრო მკაცრი, ვიდრე იყო ჩემს დროს. ჩემს დატოვებულ სტანდარტებს ხელისუფლების წევრები დღეს იცავენ".

შეხვედრები რეგიონულ მედიასთან - ასე ჰქვია ტელეკომპანია GDS-ის ახალ საარჩევნო პროექტს, რომელშიც ყოფილი პრემიერმინისტრი, ბიძინა ივანიშვილი მონაწილეობს. გადაცემას 20:30-ის ჟურნალისტები ნათია თოიძე და მიხეილ ფეიქრიშვილი უძღვებიან.