პრემიერ-მინისტრის მრჩეველი რეგიონული განვითარების საკითხებში, სოზარ სუბარი რუსთავი 2-ის წინააღმდეგ წამოწყებულ ახალ დავას გამოეხმაურა და თქვა, რომ ქვეყანაში სიტყვის თავისუფლება გარანტირებულია, "რასაც ტელეეთერიდან გინებაც ადასტურებს".

"სიტყვის თავისუფლება რა დონეზეა გარანტირებული, ეს თქვენი ეთერიდან იღვრება ყოველდღიურად, თქვენც მგონი, ზოგჯერ გრცხვენიათ ხოლმე, მაგრამ იტანთ იმიტომ, რომ რა ქნათ", — მიმართა რუსთავი 2-ის ჟურნალისტს სოზარ სუბარმა. დამაზუსტებელ კითხვაზე, სიმართლის რცხვენიათ თუ არა, სუბარმა მას უპასუხა:

"თუ დედის გინება სიმართლეა, ამ სიმართლით ეცხოვროს მაგინებელს".

პრემიერის მრჩევლის თქმით, სასამართლოში გაირკვევა, "სად არის სიმართლე და როგორ არის სიმართლე".

ნიკა გვარამიამ 6 მაისს საგანგებო ბრიფინგი გამართა, სადაც თქვა, რომ ტელეკომპანიის წილის ცხრა პროცენტის მფლობელი, ნინო ნიჟარაძე სხვა მეწილეებისგან 26 მილიონს ითხოვს. ის ამბობს, რომ სარჩელით ნიჟარაძემ სასამართლოს მიმართა. გვარამია ამ ყველაფერს ტელევიზიაზე შეტევის ახალ ფაზად აფასებს.

გარდა ამისა, სარჩელის მიხედვით, ნინო ნიჟარაძე შპს სამაუწყებლო კომპანია რუსთავი 2-ის მართვის ორგანოს — პარტნიორთა კრების 2015 წლის ოქმის ნაწილობრივ ბათილად ცნობას ითხოვს. სარჩელში ვკითხულობთ, რომ "ამ ოქმის გასაჩივრებით უნდა დადგინდეს პარტნიორების: გიორგი ყარამანიშვილის, ლევან ყარამანიშვილის და შპს საქართველოს მხრიდან უფლების ბოროტად გამოყენება, რასაც შედეგად მოჰყვა მოპასუხე პარტნიორთა არამართლზომიერი უარი ნინო ნიჟარაძის მხრიდან წილის გასხვისებაზე". იურისტი გიორგი მშვენიერაძე კი აცხადებს, რომ პარტნიორთა კრების ოქმს გასაჩივრების ვადა გასული აქვს.